AFC tan Fela Hlawndo bawk

Aizawl FC-in I League khel tur team khat an tir chhuak chungin coach Victor Lalbiakmawia hoin Zote Toyota MPL10-ah result ṭha an nei zel. AFC hian Mizoram Police laka point khat hlu tak a hlawhchhuah hnuah nimin khan Project Veng FC 2-1 in an hneh.

RG Stadium-a inkhelah hian I League club tan H. Lalruatfela'n goal ṭha bik a khung leh a, second half-ah captain K. Lalhmangaihkima'n penalty aṭangin a khung belh leh bawk. Player 10-a khelh hnuah Kolasib club-in Jehova Lalthangsanga hmangin siphurh sut ṭhen mah se goal dang an khung belh lo a, Aizawl FC 2-1 in an chak.

Fak phu AFC

Aizawl FC hi I League-a champion tawh team an ni a, academy pawh an kalpui ṭha. I League leh MPL a kalkawp avangin senior player tam zawk an zin chhuak a, academy player-te chungah rinna an nghah a ṭul.

Academy player-ten an hun ṭha neih an hmang ṭangkai a, a bik takin Durtlang North rawlthar Fela Hlawndo a che ṭha lehzual. Mizoram Police lakah Fela Hlawndo hian ṭha zetin box pawn aṭangin goal hnih a khung a, man of the match-ah an thlang.

Khelh fuh ṭum hi a awm thei a, amaherawhchu Fela Hlawndo erawh khelfuh satliah a ni lo. Nimina Poject Veng an hmachhawn ṭumah pawh box pawh minute 16-naah box pawn aṭangin mawi zetin a hlai goal a, Fela Hlawndo-in a ball pet thiamzia a pholang nawn.

Aizawl FC hian minute 57-naah academy player tho PC Pazawna an luhtir a, Project Veng rawlthar hian an veng club lakah a luh hnu lawkah penalty a hlawh chhuak nghal. Pazawna titlutu goalkeeper MS Dawngzuala chu hnawhchhuah a ni a, Hmangaihkima'n penalty hi goal-ah a chantir bawk.

A ngaihnawm zel

Project Veng hian player 10-a an khelh hnuah siphurh an sut ṭhen a, Jehova Latlhangsanga'n corner kick hmang ṭangkaiin minute 67-naah a tauh goal. Kolasib club hian hun tawp thlengin siphurh sut tumin an nawr a, goal erawh an khung belh tawh lo.

Kolasib club hi 2-1 in chak lo mah se hun tawp thlenga tha thlah loa an khel hian relegate mai an tum lo tih a lang. Project Veng hian Chawnpui FC leh Mizoram Police te an la hmachhawn dawn avangin point hmuh belh a har dawn a, chutihrualin tun round-ah an elpui FC Venghnuai leh Electric Veng FC ten point an hmuh bik loh avangin MPL ham tan dan kawng a inhawng zel.

Aizawl FC erawh chak mah se an elpuite an chak vek avangin panganaah an la awm chhunzawm. I League club hian Electric Veng leh FC Venghnuai te an la hmachhawn dawn a, an chak ve ve a nih chuan semifinal lut tura ngaih an ni.