Bangalore-ah Mizo naupang an vul

Yonex Sunrise All India Junior Sub-Junior (U-15 & U-17) Ranking Badminton Tournament 2023-ah Mizo naupangten bronze medal an hlawh chhuak a, Champhai Vengthlang tleirawl Zoramthari leh Serchhip Bazar Veng rawlthar Vanlalhruaia Sailo te ṭangdun chuan mixed doubles Under-15 category-ah bronze medal an la.

Bangalore-a neih inelnaah hian Thartei leh Hruaia te ṭang dun hian Siddique Km Ali Zayyan leh P. Sradha te ṭangdun chu 21-18, 21-17 in, straight set-a hnehin semifinal an lut a, mahse, final erawh an lut zo ta lo.

Seeded 7-na ni chunga inelna hmachhawntu Thartei leh Hruaia te hian semifinal-ah hian Mohan Krishna Kursam leh Lakshmi Ridhima Devineni, seeded no 1 te ṭangdun chu hmachhawnin, 21-11, 21-12 in an chak zo ta lo - bronze medal-ah lungawi an zir.

November 28 aṭanga neih ṭan inelnaah vek hian Thartei hian Under-15 Girl's singles category ah pre-quarterfinal a thleng a. Under-17 Boy's doubles category huangah Vanlalpekhlua Sailo leh Vanlalhruaia Sailo te unau, Serchhip Bazar veng te ṭangdun chuan pre-quarterfinal an thleng bawk.

Mizoram Badminton Association chuan thuchhuah siamin, "India ram pumpui badminton inelna lianah Mizo naupangten dinhmun sang tak tak an thleng thei hi kan lawm takzet a ni," an ti.