Zaninah Aizawl FC Vs Trau

Zanin dar 7:00 hian Aizawl FC leh Trau te Kalyani Stadium-ah an inkhel dawn a, Mizo club tan I League match thum khual muala an khelh zawnna tur a ni.

Dutch coach Erol Akbay-a'n Aizawl FC a chhuahsan hnuah Mizo club-in head coach thar an la nei lo a, Mizo coach B. Malsawmzuala chungah rinna an la nghat zel.

Sawmtea hnuaiah Mizo club-in result ṭha an nei a, foreigner pahnih chauh nei chungin I League club dang a elpha. Aizawl FC hian tun dinhmunah Serbian defender Ivan Maric leh Brazilian defender Gustavo te chauh foreinger an nei a, inhliam vangin an la khel kawp meuh lo.

RG Stadium-a Namdhari an hneh ṭumin Maric leh Gustavo te hi an khel kawp a, Brazilian defender hi minute 16-naah an thlak - tun ṭuma an zinchhuahnaah pawh hian a tel lo.

Aizawl FC hian Trau an hmachhawn hma hian Rajasthan FC (2-2) leh Real Kashmir (0-0) an hmachhawn a, point an hlawh chhuak ve ve. Serchhip tlangval Lalrinzuala'n season ṭha tak a hmang a, tun season I League-ah goal ruk a khung tawh a, Trau lakah pawh player pawimawh a ni ang.

Mizo club khingpui tur Manipur club Trau hian tun season-ah result ṭha an nei lo a, Delhi FC nen 1-1 a an inhnehtawk tih loh chu an la chak lo vek.