Messi tan chawimawina

Time chanchinbu chuan Lionel Messi chu Athlete of the Year atan an thlang. Argentina captain hian October thla mai khan a vawi riat nan Ballon d'Or a lo dawng tawh bawk a ni.

Inter Miami forward Messi hian Paris Saint Germain tana contract a hman zawh hnuin, kumin July thla khan Inter Miami a zawm. Major League Soccer (MLS) team tan hian inelna hrang hrangah match 14 aṭangin goal 11 a khungsak tawh.

Tun hma chuan Inter Miami hi eng inelnaah mah an la champion ngai lo. Messi an neih hnuah erawh thil a danglam a, a vawi khat nan Leagues Cup-ah an champion, inelna hi MLS leh Mexican club-ten an khelh ṭhin a ni.

Times chuan thuchhuah siamin, "Lionel Messi hian midangte tih ve theih loh chu a ti a ni. Inter Miami a zawm chiah khan US chu football ngaihvenna ramah a siam," an ti hial.

Messi awm hnuah MLS entu an tam a, ticket man a sangin sumdawng pawh an lut nasa. Messi hma hian gymnast Simone Biles, swimmer Michael Phelps leh NBA superstar LeBron James te chuan award hi an lo dawng tawh bawk a ni.

Kum 36 mi Messi chuan, "PSG ka chhuahsan khan, a hmasa berah chuan Barcelona lama kir leh kha ka tum a, mahse thil theih a lo ni tawh lo. A nihna takah chuan Saudi Pro League lam pawh rilruah a lang.

"Saudi leh MLS kha duhthlan tur ka neih a ni a, min ngaihven ve ve," a ti. A tawpah chuan a pian leh seilenna Argentina lam hnaiha inkhelh a duh a, a naupan lai nunphung pangngai a neih let theihna tur leh, a chen thiamna rama inkhelh a thlang ta a ni.