Newcastle-in De Gea an duh

Premier League club Newcastle United chuan Manchester United goalkeeper hlui David de Gea lakluh an duh niin khawthlang media-te chuan an tarlang a, Spanish keeper pawh hian St James' Park lam pan a hnial lo.

De Gea hian season hman zawh takah khan United-a a contract neih lai chu a hmang zo a, Old Trafford a chhuahsan. United hian amah thlak turin Cameroon international André Onana chu pound maktaduai 43-in an la lut a, mahse, Inter Milan aṭanga an lei keeper hian beisei a phak lo hle.

Onana hi January-ah Africa Cup of Nations khel turin an thang bo dawn bawk a, hei vang hian United pawh hian an keeper hlui hi lak let an duh nia sawi a ni. Mahse, De Gea hian Newcastle lam a hawi.

De Gea hian club hrang hrang aṭangin sawmna hmu mah se a beisei ang club a la hmu lo niin a lang a, a hnar zel. Tunah Newcastle an lo lang a, Eddie Howe-a team enkawl tana khelh hi a hreh lo.

Newcastle hi an keeper Nick Pope chu kar hmasa Premier League-a Manchester United nen an inkhelh ṭumin a inhliam a, English keeper hi thla li chhung a chawlh a ṭul dawn.

Magpies hian an squad-ah Martin Dubravka, Loris Karius leh Mark Gillespie te chu goalkeeper nei tho mah se, Premier League Big Six zinga inziahluh tum Newcastle boss Eddie Howe-a'n a ring tawk hlawm lo niin a lang.

De Gea hian United a chhuahsan hnuah club la nei rih lo mah se, rim takin training a nei reng a, a beisei ang sawmna a hmuha zawm mai thei turin a inpeih reng niin an sawi.

Newcastle hian zanin dar 1:00-ah tun hnaia hrem tawk Everton chu league match khel turin an lenchilh dawn a, season zawna Champions League khelh tum team tan Everton laka tlawm a fuh lo ang.