Man United-in journalist ṭhenkhat conference-a tel an khap

Manchester United manager Erik Ten Hag-a chuan December 5, Thawhlehni khan press conference a nei a, he hunah hian club lam chuan Sky, ESPN, Manchester Evening News leh Mirror aiawh journalist-te tel an khap.

Man United chuan, "Media ṭhenkhatin kan chanchin ṭha lo lai, club thuneitute be hmasa lo leh kan insawifiahna tel si loa an tihdarh avangin an chungah hremna kan lekkawh. Kan thutlukna hian kan thawhhona kawngah rah ṭha a thlen ngei kan beisei a ni," tiin thuchhuah an siam.

Sky, ESPN, Manchester Evening News leh Mirror te hian Man United player-te an lungawi loh thu leh manager an rin loh thu an puanzar vang a ni.

Man United manager Erik Ten Hag chuan, "Kan bulah an lo kal hmasa tur a ni a, kan hriat loha kan chanchin an ziak kha thil dik a ni lo. Player-ten ngaihdan an nei a nih chuan ka ngaithla thei a, mahse ka bulah engmah an sawi lo. Pahnih khat chu an lawm lo a ni mai thei a, mahse a tam zawk chuan nung tak leh huai taka khelh hi an duh," tiin a sawi.

Nizan khan Man United hian Chelsea an hmachhawn a, result kan hre hman lo.

Player an lawm lo

Sky Sports-a TV presenter Kaveh Solhekol chuan Man United-a thil thleng a hriat dan chu a hnuaia tarlan ang hian a sawi a, a thu lakna erawh a tarlang lo chungin player zing aṭanga a hriat pawh a ni thei ang.

"Player ṭhenkhatin thil awm dan an hre thiam lo a, dressing room-ah Ten Hag hian player-te rinna a hloh. Dressing room-a 50% hian player-te an ring tawh lo. Player engemaw zat chu an khelh dan hmangah an lawm lo a, an training nasa lutukah an ngai. Training-naah an tlan tam mah mahah an ngai. Player ṭhenkhatin an tlan chhan an hre lo.

"Senior player-ten Ten Hag hmuin club kal fuh lohna lai an hrilh. Heng player-te hian an tawnhriat an sawi a, club lian dang kalphungte an hrilh. Player-te chungah zahngaihna lantir deuh se an duh a, tichuan player enkawl danah hma a sawn theih an ring. Ten Hag hi hotu a ni a, thutlukna siamtu a ni a, midang ngaihdan la loin a duh danin thil a kalpui nasa.

"Kal dan nghet tak a nei a, a chet dan hi khawl (robot) ang mai a ni. Player ṭhenkhat chu Ten Hag-a'n Jadon Sancho a enkawl danah an lawm lo. Sancho hi academy naupang nen an training ho a, amahin thil a ei a, Ten Hag hian a ti mah mahah an ngai."

Matic a ṭawng chhuak

Nemanja Matic chuan Manchester United player-te discipline a chhiat thu a sawi a, Ten Hag-a harsatna tawh hi manager chhuak tawhte tawh ang tho a nih thu a sawi.

Chelsea leh Man United midfielder hlui Matic chuan, "Chelsea-ah chuan Man United buaina ang hi a awm ngai lo. Player-te an professional em em a, an hnaah an chiang. Training turin an tlai ngai lo a, thil tihsual an nei ngai lo.

"Kum khat chhungin vawi khat thawh hai palh te chu a awm thei a, Man United-ah erawh ni tin a thleng. Player tlaite hi a ngai bawk an ni a; Paul Pobga leh Jadon Sancho te an ni. Kan ngaihdan a ni ta lo a, an tlai theih miah lohna turin dan kan siam. Dan an bawhchhiat apiangin pawisa an chawi a, season khat chhungin £75,000 an chawi hman," tiin a sawi.

Engtin zel?

Media ṭhenkhatin manager Erik Ten Hag chungchangah player an lungawi lo tih an ziak a, hei hi thudik ngei niin a lang. Man United player hlui Matic ngeiin player-te discipline ṭhat tawk loh thu a sawi chhuak.

A lan danah chuan player ṭhenkhat hi thununna hnuaiah awm an harsat a, media lakah zualkoin manager ban theih dan an zawng ṭhin niin a lang. Ten Hag-a hmaa manager hna thawktu Ole Gunnar Solskjaer leh Jose Mourinho te pawhin an hna an châvn phah thawh.

Club-in Sir Alex Ferguson chawlh hnuah manager an thlak hnem tawh avangin manager hi thlak mai an tum tawh rih lo a, tun dinhmunah Ten Hag chungah rinna an la nghat zel. Chutihrualin Dutch manager Ten Hag-a'n Old Trafford-a thuneihna chelh rei a duh a nih chuan result a neih ṭhat a pawimawh ang.