De Zerbi tan contract thar a hnai

Brighton & Hove Albion boss Roberto de Zerbi chuan Premier League club-ah cham chhunzawm zel tura inbiakna an kalpui mek thu a sawi a, he thuziak i chhiar meuh chuan contract thar hi a ziak fel tawh hial mai thei.

Kum 44 mi De Zerbi hian September 2022 khan Graham Potter thlakin Brighton hi a enkawl ṭan a, Potter-a hnathawh ṭhat avangin a hmabak hi ko viaua ngaih ni mah se hna a thawk ṭha hle.

Season hman zawh takah khan Brighton chu parukna nihpuiin season a khar a, an club chanchina a vawi khat nan European football khel turin a tlinpui - FA Cup semifinal a hruai thleng bawk.

Tun season-ah pawh Brighton hi Europa League knockout round a luhpui der tawh a, Premier League table-ah pariatna an ni mek bawk.

De Zerbi chuan, "Nuam ti taka nun hmang turin hna ka thawk ṭhin a, tun dinhmunah chuan Brighton hi nuam ka ti hle a ni. Player, club chairman Tony Bloom, chief executive David Weir, technical director David Weir leh Brighton-a hnathawk zawng zawngte nen pawh kan inpawh tlang hle.

"Ni e, contract thar chungchang sawiin kan indawr mek a, mahse, engmah a la chiang lo a, kan sawi ve ṭan chauh a ni," a ti a, a ṭawngkam aṭang chuan English club-ah hian a cham chhunzawm ngei dawn niin a lang.

Sassuolo leh Shakhtar Donetsk boss hlui hi a hnathawh ṭhat avangin club dang nen sawizawm a ni fo ṭhin a, mahse, amah ber hi Amex Stadium lamah hian a lung a awi tlat niin a lang.

Italian coach chuan, "A pawimawh ber chu enge kan tum tih hi a ni a, chu chu kan sawi ho a ngai. Club nen kan hmachhawp a inang a nih chuan ka tan chuan Brighton-a thawh zel hi thil nuam tak a ni ang. Club lian zawk emaw va enkawl tumna ka nei hran lo.

"Ka tana pawimawh ber chu team ṭha tak leh player ṭha takte nena tihtakzeta hna thawh a ni mai a, hmachhawp pawimawh tak neih hi ka tan chuan a hlu a ni," a ti a, tum mumal awm loa club kaihhruai tawp a duh loh thu a sawi.