Ter Stegen hliam an zai dawn

Barcelona ṭantuten chanchin lawmawm lo hriat tur an nei a, an goalkeeper chhuanvawr Marc-Andre ter Stegen chu a hnungzang na avangin zai a ni dawn a, German keeper hi an la chhawr thei lawk dawn lo tihna a ni.

Kum 31 mi keeper hi engtianga rei nge a chawlh dawn Barcelona lam chuan an la puang zar lo a, a hliam hi zai a nih phawt hnuah a chiang tura ngaih a ni - tun karah an zai ang a, hemi zawhah hian a chawlh chen tur an puang ang.

November 12 hnuah khan Ter Stegen hi a inlan leh tawh lo a, Barcelona tan match thum ngawt chawl tawhin, a inhliam chhungin Germany chuan match hnih an lo khel hman tawh bawk.

Ter Stegen chuan, "Hetianga chawlh rih ngai hi hrehawm ka ti takzet a, mahse, hliam zai mai hi ka club Barcelona leh kan ram Germany tana a ṭha thei ang bera ka lo kir leh theih nana thil ṭha ber a ni si a ni," a ti.

Germany tana vawi 38 inlan tawh Ter Stegen hian tun season-ah Germany match neih paliah bul a ṭan vek a, Catalan club tan match 17 khel hmanin, match riatah goal a chhuah lo.

Season hmasaa La Liga Player of the Season atana thlan Ter Stegen hian Borussia Mönchengladbach aṭanga a professional zinkawng zawh ṭanin, kum 2014 khan Barcelona hi a zawm.

Catalan club tan hian match 394 zet khelhsak tawhin, La Liga nomawi panga bakah Copa del Rey (5), Supercopa de Espana (2), UEFA Champions League (1), UEFA Super Cup (1) leh FIFA Club World Cup (1) nomawite a chawipui tawh.