Jamshedpur khelmualah Chennaiyin

Tun season Indian Super League-a beisei phak lo pahnih Chennaiyin leh Jamshedpur FC chu zanin dar 8:00 hian an intawng dawn a, Men of Steel khelmualah Chennaiyin an lenglut ang.

Jamshedpur hian tun season-ah league match riat khel tawhin, vawi khat chiah an la chak a, vawi hnih draw neiin, vawi nga an tlawm tawh - table mawngphah luahtu Hyderabad aia an sanna hi point hnih chauh a ni a, vawi khat chetsuala mawng lehzuala awm thei an ni.

Chennaiyin hi inchhuang viau thei an awm bik lo - match riat an khelh tawhah vawi hnih chiah an la chak a, vawi hnih draw neiin, vawi li an tlawm.

South Indian club hian Mizoram player kawl an nei lo a, JFC lamah hian defender PC Laldinpuia leh Ricky Lallawmawma te an awm thung. Bethlehem Vengthlang tlangval Dinpuia hian league match riat an khelh tawhah a khel kim vek a, Durtlang tlangval Ricky hian match nga a khel tawh thung.