MPL club-te bukin an awm ṭan dawn : Tlai dar 4:30-ah Mizoram Police Vs Chhinga Veng FC

Zote Toyota MPL10-ah match hnih chauh khelh tur a awm tawh chungin semifinal khel tur pali zinga pakhat pawh a la chiang lo a result a ngaihnawm tulh tulh. Vawiin tlai dar 4:30 hian Mizoram Police leh Chhinga Veng te an inkhel dawn.

Mizoram team enkawltu Chhinga Veng coach Lalsangzuala Hmar chuan, "Kan vawi khat inkhelhna tur," tiin inkhel tur hi a sawi a, boruak a 'hot' nghal. Ruah a lo sur ta a nih pawhin tualchhung football ngaina chin tan chuan RG Stadium pan ngei a ṭul ang.

Vawi 1-na a awm lo!

I Day Football champion Chhinga Veng chuan MPL champion ngei tumin hma an la a, player pawh an infawm khawm ṭha. August 26, Inrinni chawhnu boruak nuam tak hnuaiah 'warm up' ṭha takin an nei a, inkhel turin an inpeih.

Mahse maw, match commisioner-in Chhinga Veng club enkawltute a hrilh a, player registration an kalpui dan a dik loh thu a hrilh. Chhingcows an che tlai hret a, hun chep tak karah insiamṭhat hman a ni tawh lo.

Police chu chaka puan an ni a, official chuan 3-0 a ni. He goal thum hi a hlu hle. Vawiin hian Police hi goal hnih china an chak lo a nih pawhin match hnuhnung bera Project Veng an hneh chuan semifinal an lut dawn.

Chutihrualin Chhinga Veng player-te an inpeih ang tho hian Police pawh an inpeih tih hriat a ṭha a, tawnhriat player pawimawh an nei ṭha zawk.

MPL Awards 2017

Vawiin hi Chhinga Veng leh Police inbeihna a ni ringawt lo a, coach lian pahnih inbeihna tiin a sawi theih. Chhingcows hi club pathum MPL nomawi chawipui tawhtu Lalsangzuala Hmar-in a enkawl a, tualchhung football-ah nomawi chawi theih zawng zawng a chawi tawh tia sawi theih a ni.

Chutihrualin BS-a Colney hian player leh coach ni chungin an veng Armed Veng chu vawi engemaw zat a champion pui tawh a, hei bakah hian Mizoram Police chu All India Police Meet-ah a champion pui. Police Meet-a nomawi chawi hi thil namai a ni lo, tun hmaa Police ropui lai zawng zawng pawh khan an chawi thei lo - BS-a hnuaiah chiah an la champion.

Coach pahnih buk a rit a, Sanga leh BS-a Colney te inkhelh dawn hi chuan MPL Awards 2017 kha a thar leh ṭhin. MPL club association buatsaih MPL Awards 2017-ah Police coach BS-a Colney chu best coach of the year-ah thlan a ni.

MPL6-ah Police chu table mawngphahah an awm a, BS-a Colney-in phase 2 aṭanga rawn enkawl ṭanin season a tawp meuh chuan pathumna hialah an invawrh chho. A record hi ropui tak a ni. Chutihrualin Sanga hnuaiah Chhinga Vengin nomawi chawi theih zawng zawng MFA Super Cup, I Day Football leh MPL an chawi vek. MPL6 league round-ah Chhinga Veng hi pakhatna an nih bawk avangin Sanga hian chawimawina an sem dan chu pawm har a ti a, tun thlengin coach pahnih enkawl team an inkhelh tawh chuan inkhel a nung ziah.

Team ṭha vs Team ṭha

Mizoram Police ṭhatzia nemnghettu chu Santosh Trophy group stage a ni. Caoch Lalsangzuala Hmar-in Police keeper F. Lalmuanawma, defender Lalhmunmawia leh Lalrinzuala, midfielder H. Lalbiakthanga leh R. Malsawmtluanga te a hruai a, hmun pawimawh a chantir vek.

Hei chauh hi a ni lo; Police hma tawnga awm Malsawmfela, Lalfakzuala leh Lalbiakhlua te chu inhliam leh chhungkaw harsatna vangin an kal thei lo zawk. Santosh Trophy group stage khelh zawh hnuah midfielder MS-a'n nasa takin hma a sawn a, MPL Awards 2017 player of the year leh ZoFooty player of the year lo dawng tawh midfielder hian a thiam a la theihnghilh lo.

MS-a hian match hnuhnung pahniha Venghnuai leh Aizawl FC an hmachhawn ṭumin goal hnih ve ve a khung a, a ṭhiante tan ball ṭha a siam nual. Amah hrechiangtu coach Sanga enkawl team lakah a che ṭha thei ang em tih hi zawhna a ni. Chutihrualin tlarhma lamah F. Lallawmkima hming lam hmaih a thiang lo a, goalkeeper Muanawma nau Lawma hi a goal khung zat ni loin a thawhrimna aṭanga teh chuan Police player-ah a ṭangkai ber zawk hial ang.

Mahse, Police tlarhnunga an innghahna Ahmuntea chu hliam vangin a chawl mek a, defender pawimawh Rinzuala chu Aizawl FC nen an inkhelh ṭuma match official laka a chet mawi loh avangin Chhinga Veng hmachhawn hunah squad-ah a awm dawn lo.

Chhinga Veng hi tun ṭum Santosh Trophy-a Mizoram team-a tel hnem ber an ni a, phase 1-ah panganaah an awm chungin player pakua ngawt an thawh. Mahse, Chhinga Veng result chhiat chhan hi club chhung buaina vang a ni a, phase 2 bikah chuan pakhatna an ni a, MPL10 tawp thlir chuan palina la ni tho mah se pakhatna Police nen an inkarah point thum chauh a awm.

Chhingcows tan Santosh kal lo ber MS Dawngliana (mimal harsatna) a rawn che ṭha leh tawh a, Lallawmsanga leh PC Lallawmkima ten Mizoram kawr an hak chhan an lantir chho bawk. Tlarhnung lamah hmabak nei êng Vanlalremruata, FC Lalhmunmawia, Lalhunruata leh Lalruatdika (Teka) ten an theihna an lantir chho ṭan a; Malsawmfela leh a ṭhiante hmaah fiahin a awm dawn..

Midfield-ah Johny Lalremruata leh Zonunmawia te inkawpin Mizoram team-a an khelhpui BT-a leh MSa te an hmachhawn dawn a ni a, goalkeeper RS Lallawmzuala pawhin Mizoram no. 1 nih tumin MPL10-ah a che ṭha chho zel. Position hrang hrang thlirin inkhel a hmuhnawm lo thei lo a ni.