Chelsea hnehtu Man United
Scott McTominay chuan tun season chhunga a vawi hnih nan Old Trafford-ah Premier League goal hnih a khung a, a goal khungte hi Manchester United tan an mikhual Chelsea 2-1 a hneh nan a tawk.
Scotland international midfielder hian October thla khan Brentford an hmachhawn ṭumin hun tawp dawnah chakna goal a lo khung tawh bawk. Chelsea lakah an hun ṭha tam tak bawhpelh mah se, tlarhma lamin goal an khung theih loh karah McTominay chu mamawh chhanna a ni.
United an chak
Erik ten Hag-a nauten season bul an ṭan ṭha tawk lo a, ṭhenkhat chuan Old Trafford chu chak harsatna hmun - Man United tan ngei pawh chak a harsa, tiin an sawi fiamthu ṭhin, tunah erawh a danglam dawn ta niin a lang.
A tir aṭangin Man United an hlauhawm, mahse captain Bruno Fernandes-a penalty chu Blues goalkeeper Robert Sanchez-a'n a lo dansak. Ball per hi striker Rasmus Hojlund zawnah kal mah se, goal bar chungah a lo thlawh liam puat.
McTominay hun a thleng ta - Harry Maguire-a ball per an lo dan per chu yard 12 vela hlaah a dawng fuh a, a dan per zeuh hi Blues player-ten an chuh buai hmain rang zetin a khung nghal, goal ṭha tak a ni.
Blues an awm mai mai bik lo. Manchester City aṭanga an lak Cole Palmer chuan chawlhlawk hmain a sut, box pawna a ball chan chu duhtawkin a siam rem a, chumi hnuah goal kilah a lirin a khung - Man United player pathum ngawt a hmaah an awm, duhtawka an pet tir kha a mak.
Second half-ah Alejandro Garnacho siamsak chu McTominay bawkin a tauh lut, a vawi khat nan hattrick siam theihna remchang nei mah se Antony siamsak erawh a khung ta lo, hun tawp lama Blues goal nawr na takah an him tluan thei ta hram.
Man United hian EPL bikah chuan Chelsea hi an mikhual ṭumin an ngam thei riau, an mikhual hnuhnung vawi 12-ah tlawm an nei miah lo - kum 11 chhung chu hetiang hian an kaltluang ta a ni, an ṭhat loh lai pawhin Blues an ngam riau tihna a ni.
Eng nge an sawi?
Man United manager Erik ten Hag chuan, "International break zawh hnuah match li kan khel tawh a, vawi thum chu result ṭha neiin ṭum khat kan vanduai. Ka naute khan an khel ṭha em em a, kawng tinrenga hmasawnna hmuh tur a awm khan min tilawm.
"A tir lam minute 30 chhung khan goal thum vel khung theihna remchang kan insiam hman, mah se kan vannei tawk lo. A hmaa ka sawi tawh ang khan fans puihna kan dawng ṭha a, chu chuan nasa takin min ṭanpui," tiin a sawi.
United hian Inrinni zanah Bournemouth an mikhual dawn. December 12, Thawhlehni zanah chak ngei ngei ngai chungin Bayern Munich nen Champions League an khel dawn a, kartawpah Liverpool an tum zui dawn avangin an hmabak a hautak hle.
Chelsea manager Mauricio Pochettino chuan, "A pawi lai chu keini lamin bul kan ṭan ṭhat loh laiin anni lam chuan an ṭan ṭha em em thung. Thahrui an ngah a, an tlan taimain an tlan tam bawk, keini aiin chak tumin an bei nasa zawk.
"Chutihrualin, goal kan chhuah kha chawlhlawk hma ngeiin kan sut thei a, theih ni se la chuan goal dang khung theihna remchang pawh kan nei. A hmawr kan bawk fuh hleihtheih loh bakah goal kan chhuah leh kha a pawi, thawhchhuah a harsa tawh," a ti.
Blues hian beiseina sang tak nena an lakluh Christopher Nkunku an la chhawr lo. France international hi a inkhelh theih hunah chuan goal khung kawnga an buaina hi a sutkian theih a rinawm, a hliam damin training pangngai chu a zawm tawh.