Liverpool 2.0 - chawl loin an kal zel e

Jurgen Klopp-a'n tun season-a Liverpool intuaithar mek hi, "Liverpool 2.0" tiin a sawi a, a enkawlna hnuaia Reds-in harhtharna an chan vanglai ang kha thlentir leh a tum - kawng dik an zawh zel.

Nilaini zan khan Liverpool hian khualmualah Sheffield United an lenchilh a, 2-0 in hnehna an chang - Virgil van Dijk leh Dominik Szoboszlai ten goal khat ve ve an khung a, coach thar Chris Wilder hoa khel Sheffield-in a chhanletna tur an nei lo.

Liverpool-in hnehna an chan avangin Premier League table-ah pahnihna an ni a, hmahruaitu Arsenal chu point hnihin an phak lo mek - team pahnih hi December 23-ah an la intawng dawn a, English top flight league a la ngaihnawm dawn chauh.

Sorry Wilder

Premier League table mawngphah luahtu Sheffield-in an mangchhia aṭanga harhna chan beiseiin coach Paul Heckingbottom an ban a, a hmun ruak luah turin an coach hlui Chris Wilder an la lut.

Kum nga chhunga vawi hnih ngawt promotion lo hmuhpui tawhtu Wilder hi fan-ten an ngaina a, Nilaini zanah pawh an muala khel an nih avangin fans thawm a ring hle - a rin chhung erawh rei lo tak a ni.

Minute 37-naah tun season-a a goal ngana turin Virgil van Dijk-a'n goal a rawn khung a, Sheffield fans thawm a reh zui - VVD goal khung tur siamsaktu hi Trent Alexander-Arnold a ni.

Liverpool 2.0

Reds-in Sheffield an hmachhawn hmain Fulham chu 4-3 in an hneh a, goal mawi tak vek khung mah se, goal thum ngawt an chhuah avangin hahdamin an chak lo - Sheffield lakah erawh Reds an insiamṭha a, 2-0 in an chak.

Liverpool tan keeper chhuanvawr Alisson a inhliam avangin Caoimhin Kelleher chungah rinna nghah a ṭul a, Fulham laka vawi hnih ngawt chesual keeper hi a chesual nawn tawh lo - James McAtee pet goal ngei tura lang chu ṭha takin a dang.

Reds-in VVD goal khung hnuah rei tak khung lo zui mah se, hun pek belh minute linaah Szoboszlai chuan a belhchhah ve leh a, goal an chhuah lo bawk - khualmuala an zin vawi kuaa goal an chhuah loh hmasak ber a ni!

A hun teah!

Alexander-Arnold-a'n a thil tih hmangin amah sawiseltute a chhang leh ta a, VVD khung tur a siamsak khan Reds tan assist vawi 75 a neihna chiah a ni - kum 2016-a Liverpool tana a match hmasa ber a khelh hnuah Premier League-a ani aia assist ngah chu Kevin De Bruyne (129) leh Mohamed Salah (80) chiah an awm.

Salah hian Liverpool tan a goal 200-na khungna remchang a nei a, mahse, Sheffield keeper Wes Foderingham chuan ṭha zetin a dansak - English keeper hian Darwin Nunez goal khung tur ni ngeia lang chu a dansak bawk.

Reds-in uiawm taka an khung lohte an thlir chuan an vanduaina an hmu ang a, chutihrual chuan Ibrahima Konate-a'n McAtee laka penalty a chawi lote kha an vanneihna a ni tel ve tho.

Chanchin lawmawm lo

Liverpool tan midfielder Alexis Mac Allister chu hliam vangin lak chhuah a ngai a, Jurgen Klopp chuan, "Rei tak a chawlh loh hram kan beisei," a ti a, he thu buatsaih a nih lai hian Argentine midfielder dinhmun tur chiang taka sawi theih a la ni lo.

Khup hliam vangin defender Joel Matip chu lakchhuah a ngai bawk a, kum 32 mi defender hi tun season-ah Reds tan a inlan a beiseiawm tawh lo. Klopp chuan, "A inhliam tih ka hmuha ka hlauhthawn ang chiah a ni a, a vanduaithlak hle," a ti.

Kum sarih liam taa German club Schalke aṭanga Liverpool zawmtu Matip hian season tawp rualin Anfield-a a contract a hmang zo tawh dawn a, Liverpool jersey hain Matip kan hmu kher tawh lo mai thei.

A lawmawm lam

Reds manager Klopp chuan, "Kan rilru puthmang a puitlingin kan paukhauh a, kan chhehvel thawm kha kan intihbuai tir duh miah lo. Sheffield kha an boruak fuh chho viau mah se kan lo beng dai thei a ni.

"Kan goal hmasa zawk a ropui a, a pahnihna pawh nalh tak a ni. Kha aia hma zawka game dinhmun tichiang thei tur kha kan ni a, mahse, point thum kan hmu tho a, kan kal zel ang," a ti.

Sheffield boss Wilder chuan, "Ṭha taka khel turin ka naute ka beisei a, beisei ang takin an khel. Mahse, kan beisei result kan hlawh chhuak lo erawh a pawi ka ti," a ti a, Premier League-a inhamtanpui chu a hna tur a ni dawn.