Man City hneh thei Villa

Premier League champion an ni a, manager ṭha bik Pep Guardiola kaihhruai niin, tunlai khawvel striker ṭha bera chhal ngam Erling Haaland neitu an ni bawk - mahse Aston Villa lakah 1-0 in an chak lo.

Villa Park hi mikhual tan inkhelh harsatna hmun a ni. Chutihrualin, champion lai Man City tan meuh chuan Aston Villa hi harsa vak loa hneh theih tur niin an lang. Mahse, Leon Bailey goal khat chu Villa chak nan a tawk.

Man City hi season kal laiah vawi thum an tlawm ta, hmahruaitu Arsenal an phak lohna chu point ruk niin table-ah palina dinhmun an luah. Season chanve an la hmang tling lo, insiamṭhatna hun la tam mah se, harh thar erawh an ngai tih a chiang.

Guardiola-a'n hrem vangin Rodri a chhawr thei lo. Spanish midfielder awm loh hian inkhelh an harsat ṭhin, an chak lohna match hnuhung pangaah Rodri hi a tel lo vek, ani tel lo chuan an midfield a hlawm ṭha tawk lo a, an nghet lo tihna a ni.

City manager Pep chuan, "Zep tur a awm lo, inkhelh kha kan harsat tlat a ni. A bik takin Villa lam goal bul hnaiah khan ball kan inpe dik hleithei lo a, kan che vel a fuh tawk loin kan game pangngai kan khel thei lo tluan.

"Rodri tel loa chak dan kan ngaihtuah a ngai," a ti. Rodri a awm chuan an match hnuhnung 43 tehmeuhah tlawm an nei lo, nipui bazar laia Rodri elpui tur leh dinpui theih tur Declan Rice an chuh na lo kha an inchhir tawh mai thei.

Arsenal manager hlui Unai Emery-a'n a club hlui tan thil ṭha a tihsak a, tunah Gunners lawmna siam mah se Inrinni zanah chuan North London club hi hneh a tum dawn - Villa Park boruak a nung khawp ang.

Kum 52 mi Emery chuan, "A sang pali zingah chuan kan awm rih ngei mai, mahse team danga nena khaikhin chi kan la ni ve lo a, champion tura rinkai pawh kan ni ve lo," tiin a naute chu boruak zangkhai tak hnuaia an khelh theih nan a ṭawngkam a fimkhur hle.

Spanish manager chuan sawi zawmin, "Inrinniah Arsenal nen kan khel leh dawn, ni hnih vel chauh hahchawlhna hun kan nei. Tuna kan rilru put ang hi Gunners kan hmachhawn hunah pawh ka naute hian pu se ka duh a ni," a ti.

Villa hian point 32 hmuin pathumna dinhmun an luah a, an hneh tak Manchester City chungah an awm. An player neih dan, sum hman tur an neih dan leh club sulhnu en chuan an dinhmun a ṭha rih viau a, eng ang tak nge an nih erawh season chawhnu lamah a hriat ang.