Floodlight hnuaiah MPL10 : Zanin dar 7:30-ah Chanmari FC Vs FC Venghnuai

Zote Toyota MPL10-ah match 48 khelh a ni tawh a, match tam zawk hi chhun pachanga khelh a ni. Round 13 aṭangin zanah khelh a ni dawn a, zan hmasa berah ṭantu nei ṭha Chanmari FC leh FC Venghnuai te chu zanin dar 7:30 hian RG Stadium-ah khelh a ni dawn.

Chanmari FC hian coach thar Laldampuia hnuaiah Laldampuia hnuaiah hnehna an chang nghal a, table mawngphaha awm Electric Veng FC chu 2-0 in an hneh. FC Venghnuai erawhin match hnuhnung berah Mizoram Police 5-2 ngawtin an hneh lo.

Mahse maw, goal luh dan aṭanga en ringawt hi a him ngai lo. MPL10-a ṭantu nei ṭha ber Venghnuai hian Police lakah chance ṭhahnem tak an insiam tih hriat a ṭha a, chak tuma an khelh ngam vanga goal chhuah tam an ni, tih hriat a ṭha bawk.

Phase 2-ah bik phei chuan Venghnuai hian point riat hmu tawhin Chanmari FC aiin point an hmu tam zawk a, ṭantu an neih ṭhat avangin player 12-a khel ang hial an ni. Venghnuai tan captain C. Ramdinmawia'n mawhphurhna a la ngam ṭhin a, tlarhma lamah Jerry Lalchhanchhuaha, Jessy Vanlalmuana, J. Lalbiakliana leh C. Ngurnuntluanga te an ṭangkai ṭhin. Chutihrualin Chhinga Veng an hneh ṭuma chakna goal khungtu Vanlalhruaia hi a pa tetna anga thlir chi a ni lo, a che rang tlat.

Chanmari hian belhchian an dawl viau bawk. Lalkhawpuimawia leh Laltlanzova ten goal an khung lo rei tawh a, an hun a inherchhuak hnai hnai tawh ngei ang. Goalkeeper Zothanmawia an nei a, Mizoram captain Lalrinchhana Tochhawng bakah Mizoram tlarhnunga player pawimawh Lalmawizuala te an awm bawk. Player pathum hi a ruala an lut a nih chuan an tlarhnung a phui ṭha viau zel.

Midfield-ah Crespo Vanlalhriatpuia a dam tawh a, match hnuhnung bera man of the match Thanglalven Gangte nen inkawpin mual laiah an pawimawh ang. Chutihrualin zanin hian pressure a sang dawn a, player theihna tak tak a lang dawn. Semifinal khelh châkna nge lian tlak hlau a kaw tawpa ṭang tih chu a takin hmuh a ni ang.