Bagan leh Odisha an inhnehtawk

Odisha-in AFC Cup aṭanga an petchhuah Mohun Bagan chu Nilaini zan khan Indian Super League-ah an tawng a, 2-0 in hmahruai mah se, an si phurh an sut zawh tir avangin 2-2 in an ṭin.

Odisha tan Ahmed Jahouh chuan first half chhungin goal hnih a khung a, goal dang lut loin chawlhlawk an hmang - hei hi Odisha hian an chakpui mai dawn niin a lang hman.

Mahse, beisei ang ngawtin thil a kal thei bik lo. Second half-ah Kolkata club tan hun ṭha a her chhuak ve thung a, Armando Sadiku chuan goal hnih khungin Bagan tan si phurh a sut zo.

Albania tan vawi 38 inlana goal 12 khung thei Sadiku-a'n a goal hnihna a khung hian hun pek belh minute lina a ni tawh a, Kolkata club an vannei takzet - hun pek belh minute kuanaah Odisha forward Diego Mauricio chu a yellow card pahnihna avangin hnawhchhuah a ni a, Bagan tan chhawrna hun erawh a awm tawh lo.

Odisha tan midfielder Lalrinliana Hnamte chu bench aṭanga luhtir a ni a, Odisha tan Jerry Lalrinzuala, K. Lalṭhathanga (Puitea), Isak Vanlalruatfela leh Jerry Mawihmingthanga ten inkhel bul an ṭan vek - Puitea, Isak leh Jerry Mawia ten goal khungna chance an nei vek a, an chhawr lo thung.

Mizo pakua awmna Odisha coach Sergio Lobera chuan, "Bul kan ṭan ṭha takzet a, mahse, a tawpah point hnih hlu tak kan hloh a ni. Second half-a kan tihsual kha kan zirchiang ang," a ti.

Nizan ISL inkhelah Jamshedpur leh Chennaiyin intawngin, an result kan hre hman lo a, zanin dar 8:00-ah Bengaluru leh Mumbai City an intawng thung ang.