Fans chungah Hodgson a lawm lo

Crystal Palace boss Roy Hodgson chuan AFC Bournemouth laka an tlawm hnua fan-te chet dan chu na takin a dem a, "Fan-te hian awm ngaihna an hre ta lo a ni," a ti a, a player-te au eltu fan-te a dem hle.

Nilaini zan khan Palace hian an mikhual Bournemouth chu 2-0 in an ngam lo a, Marcos Senesi leh Kieffer Moore ten goal khat ve ve khungin, mualneitu Palace lamin a chhanletna tur an nei lo.

Palace fan-ten an tiahpui team anga an ngaih laka an tlawm hi an hrethiam lo a, inkhelh zawhah fan-ten an au el. Mahse, Palace manager Roy Hodgson a lungawi lo a, fan-te na takin a dem.

English coach tawnhriat nei ṭha chuan, "Kan fan-te hi kan duat sual zo tawh a ni. Kan khelmualah ṭha taka khel a, result ṭha tak hlawhchhuah hi kan ti ṭhang tawh si a, kuminah erawh kan thei tlat lo.

"Theihtawp kan chhuah chungin goal chance kan insiam hnem tawk lo a, chuvang chuan fan-te a lungawi lo. He team te takte, Bournemouth hi hneh tura min beisei vang a ni. Mahse, team tenaua kan ngaih Bournemouth hi an lo ṭha hle si a ni," a ti a, fan-te a tih el.

Hodgson chuan sawi zawmin, "Second half-a ka player-te thawhrimna kha en ila, thlawpa auh phur an phu takzet. Mahse, fan-te khan awlsam taka hnehna chang turah min ngai a, an beisei ang a ni ta si lo a ni.

"Fan-te hi hun harsaah pawh min thlawp tlat turin kan nawr lui thei lo a, team an thlawp tlat ṭhinna ang kha a tiduh lo a nih chuan tilui turin kan nawr thei lo," a ti a, a lawm lo hle.

Palace hian tun season-ah league match 15 khel tawhin, table-ah 14-na an ni mek a, point 16 an nei. Match li chiah an la chak a, match li draw neiin, vawi sarih an tlawm tawh thung.

Hetihrual hian relegation zone-a awm chin Everton aiin point kuain an la sang zawk a, hlauhthawn lutuk tur niin a lang lo. Mahse, Bournemouth zawhah hian a zawnin Liverpool (home), Manchester City (away), Brighton & Hove Albion (H) leh Chelsea (A) an tum dawn a, an hmabak a hautak hle.