Doncic hoin Mavericks an chak

Luka Doncic chuan nimin zing khan thil danglam bik a thlen tir. Point 40 a nei a, rebound vawi 11 lain assiat ṭum 10 a nei bawk - basketball inelna lian leh ngaihhlut NBA huangah first half chhunga triple-double a neih vawi khatna a tawng.

Doncic awmna Dallas Mavericks chuan Utah Jazz lakah 147-97 in hnehna an chang a, an chak theih nan Doncic bakah Kyrie Irving chuan point 26 a nei a, point 12 neitu Derrick Jones Jr leh Dereck Lively II (10) ten an thawhhlawk hle bawk.

Slovanian tlangval Luka Doncic hian season duhawm a hmang chhunzawm a, vawi li ngawt mai match khata point 40 neih tlin a nei ta der mai, a nei chhunzawm zel pawhin a rinawm.

Inkhel dangah Joel Embiid-a point 50 neih hmangin Philadelphia 76ers chu Washington Wizards lakah 131-126 in hnehna an chang. Most Valuable Player (MVP) ni lai hi Sixers match hnuhnung pahnihah damlohna vangin a inlan lo a, a lo kir lehna inkhelah erawh a che na hle.

Stephen Curry pawhin player danglam bik a nihna a la lantir zel, point 31 neiin Golden State Warriors chu Portland Trail Blazers lakah 110-106 in a chakpui a, hun tawp dawn second 10 chauh awm tawhah 3-points pawimawh a nei a ni.

Nikola Jokic awmna Los Angeles Clippers erawh an che fuh lo. MVP atana vawi hnih thlan tawh Jokic hian tun season atana a vawi kua nan triple-double nei mah se Denver Nuggets chu 111-102 in an ngam lo.

Chicago Bulls chuan a zawna vawi thum an chakna ni turin Charlotte Hornets 111-100 in an hneh. Inkhel dangah Houston Rockets pawhin 110-101 in Oklahoma City Thunder an hneh a, anmahni khelmualah a zawnin match kua an chak tling ta.