Australian Open khel tur zingah Nadal

Rafael Nadal chu vawi hnih a champion tawhna Australian Open 2024-ah a inlan ngei dawn. Spanish star hian season thar a hman dan tur a tichiang tawh a, hetih lai hian tualchhung tlangval Nick Kyrgios erawh hliam vangin a inlan thei dawn lo.

Kum 37 mi Nadal hi kumin tir lam khan a inhliam a, inkhel loin kum khat deuh thaw chu a awm tawh. Season thar tawp rualin tennis chawlhsan a tum thu a sawi tawh, a inlanna apiangah champion tura rinkai ni kher lo mah se ngaihven a hlawh zual dawn.

Nadal a inlan theih dawn lai hian Kyrgios erawh, a banrek leh khup bakah a kephah hliam vangin a buai rei ta hle, hei vang hian a la inkhel thei dawn lo niin a lang, chawpchilh taka a inlan thei dawn a nih erawh chuan wildcard pek theih zingah a awm thung - hei erawh beiseina a tlem.

Season khat chhunga Grand Slam hmasa ber Australian Open hi nakkum January thlaah khelh tur a ni. Nakkum ni mah se a hun hmain thla khat vel bak a awm tawh lo, player leh inelna buatsaihtu lam tan inbuatsaih chhoh hun vanglai a ni mek.

Hrad court inelna lianah hian Novak Djokovic pawh a inlan dawn a, Grand Slam vawi 24 champion tawh hian major title la hnem a nihna leh Australian Open champion tam ber a nihna chu sawhngheh a tum dawn a ni.

Hmeichhe inelna lamah world number 1 Iga Swiatek leh champion lai Aryna Sabalenka te chu rinkai an ni dawn. Anni pahnih bakah hian tun hma lama hlawhtlinna lo chang tawh Naomi Osaka, Caroline Wozniacki leh Angelique Kerber te an awm dawn bawk avangin an inel tawk hle tura ngaih a ni.