Thla li chawl tur Nick Pope

Newcastle United leh England goalkeeper ni bawk Nick Pope chu a koki (shoulder) zai a ngai dawn a, hei vang hian thla li chhung vel chu a inkhel thei dawn lo a ni - Premier League club Magpies tan chânna lian tak a ni ang.

Kum 31 mi Pope hi Manchester United 1-0 a an hneh ṭumin a inhliam a, ni danga ball dang tura a zuan fo tawhna ṭhin angah a inhliam. Newcastle manager Eddie Howe chuan, "Beiseina tlem a awm," tiin nakkuma khelh tur Euro 2024 chu Pope tan beisei theih niah a ngai.

Magpies manager Howe chuan sawi zawmin, "Inkhel pawimawh tak tak kan hmabak a, chu bakah chuan England tan Euro khelh hmabak a nei bawk. A hliam hi zai a ngai ngei dawn tih chu ka ring lawk tawh a, thla li vel a chawlh a ngai dawn a ni," tiin a keeper chungchang a sawi.

Pope hian kum 2022 June thla khan Newcastle United hi a zawm a, a man zat tarlan a ni lo - club tana si ban nghaktu rinawm a ni. Ani bakah hian striker Callum Wilson, winger Harvey Barnes, midfielder Jacob Murphy leh Joe Willock te bakah defender Sven Botman leh Dan Burn te chu hliam vangin an chawl mek.

Newcastle United hian nizan khan Premier League khel turin Everton an lenchilh a, result kan hre hman lo. Pathianni zan hian a sang zual pali zinga awm tum ngam zinga mi Tottenham Hotspur nen an inhmachhawn zui leh nghal ang.