Kashmir-ah goal a lut lo

Nimin I League inkhel hmasa zawkah Real Kashmir FC leh Sreenidi Deccan FC an intawng a, goal a lut lo - team pahnih hi 0-0 in an ṭin a, nizana Trau leh Aizawl FC inkhel result erawh kan hre hman lo.

TRC Football Turf, Srinagar-a inkhelah midfielder Jeremy Laldinpuia chuan inkhel bul a ṭan a, Sreenidi lamah Lalnuntluanga Bawitlung leh R. Lalbiakliana ten inkhel bul ṭanin, Lalromawia chu bench aṭangin a lut bawk.

Nilaini zan I League inkhelah Rajasthan FC leh Inter Kashi chu 2-2 in an inhnehtawk bawk a, mikhual Inter Kashi lam hian 2-0 in hma hruai hman mah se si phurh an sut zawhtir a ni.

Inter Kashi hian Sumeet Passi leh Gyamar Nikum hmangin 2-0 in hma an hruai a, mahse, Richardson Kwaku Denzell leh Sandip Mandi (own goal) hmangin Rajasthan hian si phurh an sut zo.

Rajasthan tan defender Lalbiakzuala leh midfielder C. Lalchungnunga ten inkhel bul an ṭan a, Inter Kashi lamah Edmund Lalrindika chuan bul a ṭan ve thung.