Sports Minister thar Tetea Hmar

Mizoram Legisla-tive Assembly Election 2023-ah MFA Honorary Secretary ni lai Lalnghinglova Hmar (Tetea Hmar) leh India captain hlui Jeje Lalpekhlua te chu thlan tlin an ni a, Tetea Hmar hi Minister of State mawhphurhna pek niin a enkawl tur zingah Sports & Youth Services Department a tel.

Mizoram Football Association chuan MFA Honorary Secretary pualin MFA Office, Aizawl City Park-ah thingpui ruai an buatsaih a, Sports Minister hi Jeje-a, MLA-in a ṭawiawm a ni. MFA president Lal Thanzara leh MFA hruaitu dangten Sports Minister hi lo dawngsawngin, Mizoram football hmathlir ṭhahnem tak an neih thu leh chumi hlawhtlinna atana an thawhpui zel an beisei thu te, thinlung taka MFA-in football chhungkua aṭanga thlan tlin, MLA pahnihte chu an lawmpui thu an sawi a ni.

Tetea Hmar chuan MFA hruaitute zingah party hrang hrang a mite awm mah se, lungrual taka football hmasawnna atana an thawhho ṭhin thu te, amah ngei pawh MLA a nih theihna atana a thawhpui ten an duhsak vek thu a sawi a; Minister ni mah se khelmual a chhuahsan loh tur thu a sawi a, a ṭul anga finchhuah turin a ngen bawk.

MFA president Lal Thanzara chuan "Lalpan thil ropui tak min tihsak a ni," tiin MFA in an ziaktu lian leh India International player hlui Jeje Lalpekhlua te thinlung taka an lawmpui thu a sawi.

Tetea Sulhnu

Tetea Hmar hi football aṭanga hriat hlawh a ni a, Mizoramin a vawi khat nana National Under-16 Football Championship an champion khan team enkawltu zinga mi a nih bakah Vanglaini kaltlanga Mizo mipui fuih phur a, lungrual taka siamtu a ni.

Kum 20 chuang football tan a inhmang tawh a, kum 2011 aṭanga tun thlengin MFA honorary secretary hna a chelh. India rama football thuneitu sang ber AIFF-ah lut chhoin kum 2017-2022 chhung League Committee-ah Deputy Chairman hna chelhin nikum aṭang khan Chairman hna a chelh.

AIFF Executive Committee-ah hian kum 2017 aṭangin a tel ṭan a, Technical Committee-ah kum 2013-2017 chhung a awm bawk. Tetea Hmar kaihhruaina hnuaiah Mizoram football-in nasa takin hma a sawn a, Mizoram Premier League duang chhuaktu niin Mizoramin National Games-a gold medal leh Santosh Trophy-a an champion theih nan a hnathawh hi a pawimawh hle.

Grassroots football hlawhtlinna kawngah a thawh hlawk a, Mizo footballer ṭhahnem takin amah vangin phai club ṭha zawk an zawm theih phah. Mi bik a nihna nemnghet turin Tetea Hmar hian AIFF aiawhin kum 2017 khan 67th FIFA Congress a chhim tawh a, hemi kum vek hian 27th Asian Football Confederation Congress a chhim bawk. Kum 2021 khan South Asian football Federation, Maldives-a neihah AIFF palai a ni a, kum 2014-a Manchester, UK-a Soccerex Global Convention neih a nih khan a chhim bawk.

MLA Election 2023-ah pawh Tetea Hmar hian result duhawm a nei a, minister ni lai Lalruatkima nen an inkhing chungin a pumpuiah vote percentage hmu sang ber a ni a; booth zawng zawngah a chak vek bawk.

Mi bik Jeje-a

Mizo professional footballer hmasa ber S. Malsawmtluanga'n kawng a sut kuak hnuah Tetea Hmar kaihhruainain Jeje Lalpekhlua'n kawng thui zawk a rawn zawh a, tun dinhmuna Mizo footballer piang tawha sulhnu nei ṭha ber a nih bakah India ram pum ang pawhin a langsar zinga mi a ni.

Jeje hian Mizoram team aṭanga bul ṭanin Pune FC leh Pailan Arrows-ah te a inchher hriam a; Dempo, Mohun Bagan leh East Bengal-ah te a khel vek tawh a, Chennaiyin-ah phei chuan club legend a ni. Hnahthial pa Jeje hian I League leh ISL nomawi a chawi vek a, mimal lawmmanah pawh FPAI Best Young Player Award, AIFF Emerging Player of the Year, FPAI Indian Player of the Year leh AIFF Player of the Year thlengin a dawng vek.

Jeje hi inhliam vangin chawl hma deuh mah se India aiawhin vawi 56 a feh chhuak hman a, goal 23 khungin amah aia khung tam chu Sunil Chhetri, IM Vijayan leh Bhaichung Bhutia te chauh an awm. Hei hian India ram football-ah a dinhmun sanzia a pholang.

India aiawha Jeje khelhpui ṭhin Eugeneson Lyngdoh kha kum 2021 khan Meghalaya MLA atan thlan tlin a ni a, Eugene-a hnung zuiin kum naupang takin Jeje pawh MLA a ni. Football-a hlawhtlinna a chan chhoha Hnahthial leh a khaw chhehvela beisei let nei miah loa thilpek a pek ṭhin chuan tunah rah ṭha a thlenah a ngaih theih.

Jeje chuan, "Football career-ah hian thil harsa tak tak ka lo tawk tawh ṭhin a, tun ṭumah pawh hian min huphurhpui a, ka tling an ring lo. Mahse, khelmual ang thoin ka zam lo a, ka hlauthawng lo. Eng anga ṭha pawh hmachhawn dawn ila, theih ang tawka ṭhaa inbuatsaih leh Pathiana innghah chu ka tih theih awmchhun a ni tih ka hria. Hei bakah hian thawhpui ṭha tak ka nei a, ka lawm hle," tiin Vanglaini a hrilh. India captain hlui hi ZPM ticket a dingin Mizoram politician langsar ber zinga mi Dr. R. Lalthangliana a hneh a ni.