Bournemouth hmaah Man United fiahna

Zanin dar 8:30 hian Manchester United-in Premier League-ah Bournemouth an mikhual dawn a, Old Trafford-a inkhel tur hi Erik ten Hag-a hote tan fiahna a ni ang. Newcastle United an hneh loh hnuah kar tir khan club chhung buaina a irh chhuak a, mah se Man United hian kar laihawlah Chelsea an hneh.

Old Trafford-a Ten Hag-a nauten Chelsea 2-1 a an hneh ṭum hian an khel ṭha a, inkhel a nung hle. Goal hnih khungtu Scott McTominay phei chuan, "Kar tina kan khelh dan tur a ni," tiin an khelh dan chu chhunzawm zel theih atan a duhawm thu a sawi.

Blues laka hnehna an chan avangin Ten Hag-a chunga pressure engemaw zat lak kianin a awm a, dressing room-ah pawh player-ten an la ring ngamah a ngaih theih. Mahse, tun season-a an khelh dan thlirin Man United hi rin ngam har tak an ni.

Brentford leh Sheffield United an hneh zawn hnuah an hmelma Manchester City lakah 3-0 in an mualpho a; Fulham, Luton leh Everton an hneh zawhah Newcastle United an hneh lo. Tuna an hneh hi Chelsea ni bawk mah se Mauricio Pochettino hote hi tun season-a khelh fuh nei hlei thei lo an ni.

Man United hian pet goal-tu bik an la nei thei lo a, club tana pet goal tam ber chu McTominay niin goal nga a khung tawh. Goal khung tura lakluh Rasmus Hojlund-a'n league match 15 khelh zawhah goal a la khung lo a; Marcus Rashford (goal 2), Anthony Martial (1) leh Antony (0) ten mawhphurhna an la thei ṭhin lo bawk.

Cherries lakah hian Man United tan tu nge mawhphurhna la ang tih hi zawhna a ni. Andoni Iraola enkawl team hi table-a 15-na an nih avangin dah hniam a rem lo bawk. Bournemouth hian match kaw chhung chak hmel an hmuh loh hnuin match hnuhnung parukah vawi li an chak a, an hneh loh chu Man City an ni. Cherries hian Newcastle an hneh thei a, Aston Villa an chelh thei bawk.