Manipur club sawptu Aizawl FC Mizo club-in Shillong club tlawh lehnghal dawn

Aizawl FC-in December 7, Ningani zan I League inkhelah Manipur club Trau chu 5-1 in an sawp a, B. Malsawma kaihhruai Mizo club hian December 10, Pathianni tlai dar 2:00 hian Shillong Lajong an hmachhawn lehnghal dawn.

Kalyani Stadium, Kolkata-a inkhelah goal chance a tam a, minute 10 chhungin team pahnih hi an goal khung pawmsak an ni lo ve ve. Minute 13-naah Robinson Singh-a'n a tauh lut a, Aizawl FC defender Lalmuanawma'n a veng ṭha tawk lo.

Mizo club an insiam ṭha vat a, Joe Zoherliana penalty hlawhchhuah chu minute 16-naah Lalrinzuala'n goal-a chantirin si phurh a sut nghal. Minute 23-naah R. Ramdinthara cross chu Rinzuala bawkin goal-ah a chantir a, Serchhip tlangval hian I League-ah goal riat a khung der tawh.

Second half ṭantirah Mizo club an che ṭha leh a, Rinzuala cross-in Gerard Williams a per hnuah goal-ah a lut a, minute 51-naah 3-1 a ni. Minute sarih chhung lekin goal thum an khung a, minute 53-na leh 57-naah Zohera'n a khung belh. Lengpui tlangval hian corner kick aṭanga ball kal a ke zawna tla chu chiang takin a pet goal. Zohera hi right back-a khel ni mah se Lengpui tana midfield-a khel fo a ni a, Aizawl FC goal ngana pawh hi box chhunga ball vir puiin chiang takin a pet lut.

Aizawl FC hian Namdhari an hneh hnuah khualmualah match thum khel leh tawhin point nga an sual chhuak a, match li chhung hneh loh an tawng tawh lo. Pathiannia Mizo club khingpui tur Shillong Lajong erawhin tun season-ah hneh loh an la tawng lo hrim hrim a, an mualah phei chuan khelh an harsa dawn.

Mizo club enkawltu B. Malsawmzuala chuan, "Kan chak ang tih ka sawi thei lo a, mahse Shillong Lajong record ṭha tak tihtawpsaktu nih hi ka duh. Player-te chungah rinna ka nghat ngam a, an theihna a sang tih ka hria. Lajong lakah pawh hian theihtawp min chhuahsak leh ngei ka beisei a ni," tiin Vanglaini a hrilh.