Tum inang lo : Electric Veng Vs Aizawl FC

Zote Toyota MPL10 inkhel boruak a hot ta hle. Vawiin tlai dar 4:00 hian Electric Veng FC leh Aizawl FC te an inkhel dawn a, relegate thei dinhmuna ding leh semifinal khel lo thei dinhmuna ding an ni.

Aizawl FC hi coach Victor Lalbiakmawia'n a ho a, I League khel tura zin chhuak ve lo leh academy player-te chu chhawr theih turin an awm. AFC 'kim lo' hi Victor-a hoin an che ṭha a, Mizoram Police an chelh bakah Project Veng an hneh.

Lalruatfela Hlawndo-in AFC tan hming a chher a, match hnih lekah goal thum khungin man of the match-ah an thlang ve ve. Durtlang North rawlthar Fela Hlawndo hian goal thum hi box pawn vek aṭangin a khung a, mahse hna an la zo lo. Aizawl FC hi panganaah awm mah se khelh hmabaka awm Electric Veng leh FC Venghnuai te an hneh chuan semifinal lut tura ngaih an ni a, match tawp ber hi squad kima an khelh theih a beiseiawm avangin vawiin tlai inkhel hi a pawimawh lehzual.

Aizawl FC hi kim loa khel tur an ni a, chutihrualin an kim lo chung hian Electric Veng aiin player langsar an kawl hnem zawk. I League club hi chak ngei tura ngaih an ni tho a, chutihrualin phase 2-a point khat chauh la hlawh chhuak Electric Veng hi en hniam ngawt a rem lo. An intawn hmasak ṭum khan Aizawl FC hi 1-0 chauhin an chak a, goal awmchhun hi Lalrinzuala khung a ni.

Lalrinzuala leh player ṭha dang awm loh lai hi Electric Veng tan I League club laka point hmuhna remchang a ni a, table mawngphah chhuahsan theihna hun ṭha a ni ang.