Mizoram under 16 an chak

India ram pum state hrang hrang cricket hmanga inelna Vijay Merchant Trophy - Men's Age Group U-16 ah Mizoram U-16 team chuan Arunachal Pradesh U-16 te chu innings leh run 100-in an sawp.

Mizoramin vawm hmasain Arunachal Pradesh te run 43 chauh siamtirin an vawm out vek. Zemabawk rawlthar Lalnunzira chu Arunachal Pradesh lamin an ngam lo hle, over 11 a vawmah run 19 chauh pein wicket kua a la.

Mizoram lamin bat vein run 231-ah mi 9 out-in an duh tawk (declared) a, Imanuel Lalpekhlua’n run 66 siamin Zothangpuia leh C. Laldinpuia ten run 38 ve ve siamin an thawh hlawk hle a ni.

Arunachal Pradesh lamin bat ve lehin run 88-ah bawk an out leh vek. Mizoram 1st innings hi run 100-a um phak loin Mizoram lam pawh bat chhunzawm ngai loin an chak. 2nd innings-ah hian Lawmkima chuan wicket ruk a la ve leh a, Lalnunzira'n wicket hnih a lak belh avangin he match-ah hian wicket 11 lai a la.