Tottenham leh Newcastle an chak lo: Pathianni zanah an intawng zui dawn

Tottenham Hotspur chu an mikhual West Ham United lakah 2-1 in an chak lo a, inkhel dangah Everton chuan an mikhual Newcastle United chu 3-0 in an sawp bawk - Ningani zan Premier League inkhelah team ṭha pahnih an mualpho.

Pathianni zan dar 10:00 hianTottenham Hotspur Stadium-ah Spurs leh Magpies hi an inkhel zui dawn, an chak lohna aṭanga insiamṭhat nghal an tum ang - season thar Champions League khelh tum tan chak zawk nih a pawimawh dawn hle.

Hammers an chak

Tottenham Hotspur lamin defender hrem tuar zo hlim Cristian Romero hmangin goal khung hmasa mah se, mikhual team West Ham lamin Jarrod Bowen hmanga an sut bakah James Ward-Prowse chuan chakna goal a khung zui bawk.

West Ham manager David Moyes chuan, "Tottenham khelmuala hnehna chan chu a hlu takzet, ka naute khelh dan phungah ka lawm hle. An thawkrim em em a, goal venhim kawngah kan ti ṭhain a nawr dan pawh kan thiamin kan ṭangrual hle," tiin a lungawi thu a sawi.

Hammers hian inelna hrang hranga an match hnuhnung paruk aṭangin vawi nga hnehna an chang thei. Premier League season bul ṭan fuh lo mah se, tunah chuan match 15 aṭanga point 24 hmuin pakuana dinhmun an luah leh tawh a ni.

Moyes-a naute hian Pathianni zan dar 7:30 hian Fulham an lenchilh zui leh nghal dawn a, kar lehah Europa League khelh chhunzawm tur an neih bawk avangin hmabak a hautak dawn - Europa Conference League champion hian insiksawi deuh an mamawh ang.

Pawm a harsa

A tirah chuan duhthusama ṭhain Premier League season bul an ṭan a, tunah chuan an che hleithei lo. Tottenham hi inelna hrang hranga an match hnuhnung pangaah vawi li an tlawm a, point hlawh chhuak thei dinhmuna an din hnuah a zawnin vawi nga an hloh fai vek.

Tottenham captain Son Heung-min chuan, "Tun aia result ṭha hi kan phu a, point khat tal hlawh chhuak tur chuan kan khel niah ka ngai, point hmuh loh tawp hi chu pawm thiam a harsa a ni. Hemi kawngah hian player ten mawh kan phur.

"A bik takin tlarhma lama khel ṭhin player ten mawh kan phur zual, goal khung thei ni ila chuan inkhel kan thunun ang a, engkim kha a tawp mai tur a ni," tiin an chak loh chhanah mawh a phur tih a sawi.

Ange Postecoglou pawhin inkhel thunun tak chung sia an chak thei lo chu pawi a tih thu a sawi a, league bikah phei chuan hnehna an chan hnuhnung ber chu October thla daih tawh kha a nih avangin insiamṭhat an mamawh tawh takzet.

Magpies an tlawm

Point 10 an paihsak avangin an lungngai a, season hmang ṭha pangngai tak kha Premier League table mawngphah lamah Everton an talbuai. Mahse, an tan ruah a sur reng bik lo - hun tawp hma minute 11 chauh awm tawhah goal thum ngawt khungin Newcastle United 3-0 in an hneh.

Toffees tan hian Dwight McNeil, Abdoulaye Doucoure leh Beto ten goal khat ṭheuh an khung a, mikhual team lamin a chhanletna tur an nei lo - captain Kieran Trippier pawh ni dang angin a khel ṭha lo a, a tihsual vangin goal an chhuah phah zawk a ni.

Eddie Howe-a'n hliam vangin a player ṭha ṭhenkhat a chhawr thei lo a, chhuanlam tur a nei. Chutihrualin, tun season khualmuala league match an khelh hoah vawi khat chiah chak ni hmel an la hmu - Sheffield United mualah 8-0 in an chak a nih kha.

Season hmasa 2022-23 khan Newcastle United hi vawi nga chiah an tlawm, tun season-ah erawh match 15 an khelh aṭangin nikuma an chak loh zat nen a inang ta reng a, palina nih phak tum tan chuan inenfiah a ngai dawn hle.