Everton mualah hriatthiam har Chelsea

Chelsea leh hmeichhe ngaihtuahna inanna in hre duh em? Hriatthiam an har ve ve! Tun season-a tluk leh din fawm reng mai Chelsea hi Pathianni zan dar 7:30-ah Premier League khel turin an inlan dawn a, khualmualah Everton an lenchilh dawn.

Chelsea hi Premier League table-ah 10-na ni mekin, match 15 khelh tawh aṭangin point 19 chiah an la nei a, an beisei angin season an hmang lo chiang hle - tun season-ah league-a a zawna chak hi vawi khat chiah an la nei!

Blues hian an match hnuhnung berah Manchester United chu 2-1 in an ngam lo a, zanina an lenchilh tur Everton hian 3-0 ngawtin team ṭha Newcastle United an sawp thung - a hmuhnawm dawn.

Beisei phak lo

Chelsea-in nipui transfer-ah ringawt player lakluh nan pound maktaduai 450 chuang an seng a, player an lei nasat em avangin fan-te ngei pawhin lawm tur nge lawm loh tur an hrethiam lo a, an team khelh dan tur an hisap ṭhin a, an suangtuah thiam lo!

Season an ṭan ta ngei a, an league match hmasa parukah vawi khat chiah an chak! Chelsea fans an la beidawng lo - Fulham (2-0) leh Burnley (4-1) a zawna hnehin an insiamṭha leh a, Chelsea tak tak kha kan hmu leh dawn niin a lang hman.

Mahse, a hnu match sarihah vawi hnih chiah an chak a, "Chelsea an insiamṭha ta," kan tih hnu lawkah an tluksawp thu tarlan a ngai leh ṭhin a, tun ṭum Chelsea zet chu "Hriatthiam an har" tih loh rual an ni lo a, sawi dan thiam an har!

A hun tawh

Chelsea hian tun dinhmunah champion chu sawi loh, Champions League khelh phak aiin relegate an hnaih zawk - table-a palina City hi point 11-in an phak lo mek a, relegation zone china awm Luton Town aia an sanna hi point 10 chiah a ni!

Blues manager Mauricio Pochettino tan a theihna pholan tak tak a hun tawh a, result ṭha an hlawh chhuak lo leh a nih ngat chuan tun season-a coach ban hmasak zingah a tel a nih pawhin a mak lo ang.

Mahse, Everton hi dan bawhchhiat avanga point 10 paihsak an nih hnua thawh leh tum mek an ni a, Ningani zan khan Magpies chu Dwight McNeil, Abdoulaye Doucoure leh Beto goal hmangin 3-0 in an hneh tih theihnghilhsak loh a ṭha.