Barca-ah Torres a lungawi lo

La Liga champion Barcelona forward Ferran Torres chu Catalan club-ah a lungawi lo nia sawi a ni a, thlasik transfer-ah chhuahna tur a zawng hial a nih pawhin a mak lo ang.

Valencia-a hming chhertu Torres hian August 2020 khan Spanish club chhuahsanin Manchester City a zawm a, English club tan season khat leh a chanve chiah a khel hman tihin Spain-ah a kir - Barcelona a zawm.

Catalan club-a a season hmasa berah match 26 khelin goal sarih a khung a, season hmasa khan match 45-ah goal sarih a khung bawk. Tun season-ah pawh bul a ṭan pangngai viau a, mahse, coach Xavi enkawlna hnuaiah hmun a chang phak meuh lo.

Barca hian tlarhmaah Robert Lewandowski an nei a, Polish striker hian tun hma a phak tawh lo chungin Xavi-a rin ber a la ni reng a, kum 23 mi Torres hian hei hi a hrethiam lo nia sawi a ni.

Spain tan vawi 40 inlana goal 18 khung thei Torres hian tun season inelna hrang hrangah match 19 khel tawhin, goal nga a khung a, assist vawi hnih a nei - heng zinga match 10-ah bul a ṭan a, vawi ruk an thlak.

A tawi zawnga sawi chuan Torres hian minute 90 khelh tluan hi vawi thum chauh a nei tihna a ni a, khelmualah hun tam zawk hman a duh avangin Barca chhuahsan a hnial lo.

Torres hi season ṭantirah khan Barca chhuahsan tur anga sawi thawm a awm a, mahse, amah ber hian Barca-a hmun a chan theihna tura beih a thlang. Tunah erawh a beidawng ve ta niin a lang.

Barca hi Pathianni zan dar 1:30-ah league match khel turin an inlan dawn a, hmahruaitu Real Madrid ang thoa point 38 hmutu Girona nen an intawng dawn.