Inkhel thei Ismael Bennacer a hlim

AC Milan midfielder Ismael Bennacer chu hliam vanga ni 200 chuang a inkhelh theih loh hnuin khelmual chhungah a inlan ve leh ta a, a tan chuan ṭha pangngai taka inkhelh ve leh theih chu hlimna tur hlir a ni tih a sawi.

Algeria international hi May thlaa Inter Milan nen Champions League semifinal an khelh ṭumin a inhliam a, a chawl ta ngar ngar. An match hnuhnunga Frosinone 3-1 a an hneh ṭum khan bench aṭangin a lut.

Kum 26 mi Bennacer chuan, "Khelmual chhunga ka luh chiah kha chuan, ka hun harsa tawn leh hrehawm taka ka awm tawhna te zawng zawng kha ka theihnghilh nghal vek.

"Mipui lamin ka hming an lam ri dual dual a, ka inkhel thei ve leh ta min duhsakna thu hriatte kha ka tan chuan a nuam lutuk. Hun harsa a paltlang theihna chhan chu fans leh min thlawp tlattu ka ṭhiante vang hi a ni," a ti.

AC Milan hian zanin dar 10:30 hian Atalanta an lenchilh dawn a, inkhel pawimawhah Bennacer hian minute tam zawk a chan ngei a rinawm.