Arsenal an chak lo

Premier League hmahruaitu ni chungin kartawp an hmang a, tun kar thar a lo chhuah meuh chuan hmahruaitu an ni ta lo - Arsenal chuan an duh loha an ban hnu Unia Emery enkawl Aston Villa 1-0 in an ngam lo.

Inkhel dangah Liverpool chuan Crystal Palace 2-1 in an hneh. Reds hian EPL match 16 aṭanga point 37 hmuin table hmahruaitu an ni a, khelh zat inangah Arsenal aiin point khatin an sang zawk.

Goal khat

Inrinni zan inkhelah hian, ṭan aṭanga minute sarihna lekah Villa tan John McGinn chuan goal awmchhun a khung. Aston Villa captain hian Leon Bailey hnen aṭanga a ball hmuh chu a virpui a, box laiah rang zeta a insiamrem hnuin keeper David Raya dan theih loh turin a khung.

Hun tawp dawnah Gunners tan Kai Havertz chuan si phurh sutah a inngai, mahse video assistant referee (VAR) hmanga rei deuh tak endik a nih hnuin goal hi an hnawlsak a, kut ruakin Villa Park an chhuahsan a ni.

Emery enkawl Villa hian anmahni khelmual an hmang thiam takzet, an match hnuhnung zawkah pawh Manchester City an hneh, tunah Arsenal hneh lehin league match bikah mikhual an thlen hnuhnung 15-ah hnehna an chang vek.

A phui lo

Hrem vangin Mikel Arteta-a'n khelmual sir aṭangin a naute a ho thei lo. Spanish manager hian an khelh dan tur phung erawh a ruahman tho a, ni dang ang bawkin Oleksandr Zinchenko chu defender ni mah se ball sem tuin a tlan kual a, mahse a awmna lamah ball hlauhawm a awm fo thung.

Gabriel Jesus leh Martin Odegaard ten hun remchang ṭha bik nei mah se, goalkeeper Emiliano Martínez an paltlang thei tlat lo. Gabriel Martinelli pawhin Martinez-a pet khum tawh mai turah thutlukna a siam fuh lo a, goal an nei thei tlat lo.

Season hmasa aṭangin Arsenal hi team ṭha leh tlo zinga mi an ni, mahse hun pawimawh laia point hloh leh zauh an ching - EPL champion meuh ni tur chuan thlasik bazar an hman ṭhat a ngai dawn niin a lang, inkhel harsatna hmuna goal khung thei an mamawh.

Villa an sang

Aston Villa hi English football inelna sang an champion hnuhnung ber chu 1980-81 season daih tawh kha a ni, an champion kum ai hian kuminah hian match hmasa 16 aṭanga an point hmuh zat hi a tam! Point 35 hmuin pathumna dinhmun an luah mek.

Arsenal lakah an goal neih chhun an hum a ni satliah lo a, striker Ollie Watkins-a vanneih zan ni se la chuan goal dang pawh an khung belh mai thei. Attacking football ngainatu Emery leh a nauten an mikhual tan goal hlauhawm an nei fo.

Emery chuan, "A sang zual pasarih zinga tel tur pawhin keini aia team ṭha pasarih an awm, chutiang chung chuan tunah hian pathumna kan ni mek. Kan thlen leh chet dan chinah hian lawm tur kan ni," tiin a naute a chhuang hle.