Liverpool awmna chu a chung ber!

Thlasik boruakin min tuam a, khua a vawt ṭan - Liverpool pawh a chung berah awmin vawt an ti ṭan e! Inrinni zan khan Reds hian khualmualah Crystal Palace chu 2-1 in an hneh a, an elpui Arsenal an tlawm zui bawk si avangin Premier League table chung ber an luah.

Mahse, Selhurst Park-a inkhelah hnehna chang turin Reds-in vanneihna an mamawh tel a, Philippe Mateta chuan penalty hmangin Palace tan goal hmahruai a khung.

Mahse, Palace forward Jordan Ayew hnawhchhuah a ni a, a tam zawka an khelh hnuah Liverpool-in goal hnih khungin, 2-1 in an chak daih - table chung berah an awm a, season khar nan an it khawp ang.

Palace vanduaina!

Crystal Palace-in first half-ah penalty an hlawh chhuakah an inngai a, referee pawhin spot a kawk vek tawh. Virgil van Dijk chuan Odsonne Edouard a titlu a, referee Andy Madley chuan penalty tur ngei nia ngaiin spot a kawk.

Mahse, video assistant referee an inrawlh a, Reds midfielder Endo ball chhuhsaktu Will Hughes chu a foul tih a lan avangin referee-in a thutlukna a sut - Palace an nguai a, Liverpool an lawm thung.

Liverpool hian inkhel thunun zui mah se a pawimawh ber goal an khung thei lo a, Palace-in an khung hmasa zawk ta tho. Jarell Quansah chu Mateta lakah a foul a, penalty hlawh chhuaktu Mateta hian minute 57-naah goal-ah a chantir.

Liverpool an tlo

Mahse, Liverpool an hnual rei lo. Minute 75-naah Ayew chu a yellow card pahnihna a hmuh avangin hnawhchhuah a ni a, player tam zawk ni chunga an khelh aṭanga second 98-na lekah Salah chuan si phurh sutna goal a khung.

Salah hian a duhtawk mai lo - hun pek belh minute khatnaah Elliot khung tur a siamsak leh a, point insem mai tura an lan tawh hnuah Liverpool-in an huaisen rah sengin, point thum an hlawh chhuak.

Tun season inelna hrang hranga goal 14 khung tawh Salah hian Reds tan match 327-ah goal 200 a khung ta chiah a, assist vawi 86 a nei bawk - June 2017-a pound maktaduai 34-a Liverpool zawmtu hi Reds tan a vul zel.

Beiseina

Liverpool boss Jurgen Klopp chuan, "A tir lam minute 76 chhung khati taka chhiaa khel chunga, chak thei team ka hmuh hmasak ber a nih thu ka naute ka hrilh hial. Tun ang hun harsaa kan mamawh ber chu result ṭha hlawhchhuah zel hi a ni mai.

"Football hmuhnawm tak pho chhuak reng a, Oscar award dawng tura bei kan ni lo a, a pawimawh ber chu point thum a ni. A pawimawh ber point thum chu kan hlawh chhuak a, kan hlim em em a ni," a ti.

Salah chuan 2019-20 season-a league nomawi chawitu Liverpool leh tun season-a Liverpool khaikhinin, "A tawp thlenga beih duhna thinlung ang kha ka hmu a, kan ti zel. Player pasarih bawr vel hi chu a thar an ni a, team thar ang mai kan nih avangin inpuih tawn reng a ngai. Anni pawh an inzir reng a, thawhpui an nuam - thil danglam tak kan tih theih ka beisei," a ti a, beiseina a nei sang hle.