Old Trafford-ah United an mualpho

Mikhual tana hmun ṭihbaiawm leh ralṭi, a neitu Manchester United tan erawh ennawm ropui chhuahna ni ṭhin Old Trafford chu Bournemouth tan nuam tawlna hmun mai a ni - Cherries lakah Erik ten Hag leh a naute 3-0 in an mualpho.

Bournemouth tan striker Dominic Solanke-a'n minute ngana lekah goal hmahruai a khung ṭan a, second half-ah Philip Billing leh Marcos Senesi ten goal khat ve ve an khung bawk, an goal chhuah danah Man United lam an inenfiah a ngai.

Sergio Reguilon-a ball pet chhuah fuh tawk lo vangin Bournemouth lamin an nawr let thut a, a laia awm Solanke-a'n a khung nalh viau. An goal hnihna pawh box chhunga ven theih tura ngaih Billing-a'n duh tawka a tauh a nih bakah, goal hnuhnung ber luh dawnah pawh Senesi an veng tawk lo.

Man United hi nasa lehzual zawka mualpho thei an ni - hun tawp dawnah substitute Dango Ouattara chuan an goal lina a khung a, mahse video assistant referee (VAR) hmanga an ennawn hnuah an hnawlsak.

Man United manager Erik ten Hag chuan, "Kei leh ka naute, player leh club chhunga mi zawng zawngte kan result avangin kan lawm lo. Hetiang hi chu thil thleng lo tur a ni, kan zavaia mawhphurhna a ni bawk ang.

"Kan hmaah engin nge min hmuak kan hria, kawng dik lam kan zawh a ngai. Chelsea nen kan inkhelh ṭum leh tun ṭum kan match chu a inang lo hle, kan insiamṭhat nghal a ngai," tiin a sawi.

Manchester United hian Thawhlehni zanlai dar 1:30 hian Champions League group match khel turin Bayern Munich an mikhual ang. Last 16 lut tur chuan an chak ngei ngei a ngai, kar tawpah Liverpool an lenchilh zui leh bawk ang.