Aizawl FC an chesual, Electric an êng

Aizawl FC-in I League an khelh avangin Zote Toyota MPL10-ah kim loin an khel a, match hnihah vawi hnih chak mah se vawi thumnaah an chesual. Inrinni tlai khan Aizawl FC hian table mawngphaha awm Electric Veng FC chu 2-1 in an hneh lo a, semifinal lut turin Chhinga Veng result-ah an innghah a ṭul phah. Electric Veng erawh point thum hlu tak an hmuh avangin table mawngphah an chhuahsan.

RG Stadium-a inkhelah Electric Vengin chak an mamawh tih hriain captain C. Lalhriatpuia hoin na takin an nawr a, Aizawl FC lam an duai bik lo. Match hniha goal thum khung thei H. Lalruatfela'n match thumnaah goal khung tawh lo mah se penalty a hlawh chhuak a, a ball petin Electric Veng player kut a per. AFC captain Hmangaihkima a rawn pen chhuak a, goalkeeper V. Lalthlamuanpuia'n a dansak.

Aizawl FC-in an hun ṭha neih hmasak an khung loh an tuar a, minute 66-naah KC Malsawmsanga'n AFC goalkeeper Joel B. Lalramchhana tihsual hremin goal hmahruai a khung. Goal khung hnuah Electric Vengin tlarhnung an tiphui a, Aizawl FC-in goal khung tumin an nawr.

Injury time-ah EFC-in counter attack hmangin a chhu let a, Laltluangpuia'n goal hnihna a khung. Hemi hnu hian corner kick aṭangin AFC defender Rohmingthanga'n si phurh sut mah se goal dang khung belhna hun a awm tawh lo.

Round 14-ah Mizoram Police-in Project Veng an hneh a, Aizawl FC-in FC Venghnuai an hneh bawk chuan Electric Veng an him. EFC hian Chawnpui FC an hneh chuan an him hrim hrim bawk. Aizawl FC tan erawh FC Venghnuai an hneh ngei a ṭul a, hemi zawh hian league match hnuhnung bera Chanmari FC leh Chhinga Veng inkhel result an ngaichang ang.