Frankfurt-in Bayern 'kim' an sawp!

Bundesliga-ah champion lai Bayern Munich an chak lo, an chak lo satliah lo - Eintracht Frankfurt lakah 5-1 ngawtin an tlawm. A mak lai erawh Thomas Tuchel-a hote hi an kim ṭha! Nomawi la chawi ngai lo Harry Kane-a'n nomawi duhin Bayern pan mah se champion lo thei dinhmunah an ding.

Inkhel dangah Bayern elpui Borussia Dortmund pawh an chak lo a, an hneh loh hi RB Leipzig a ni thung. Nizan khan Bayer Leverkusen an inkhel a, Xabi Alonso hote hian VfB Stuttgart an hneh chuan point rukin an sang fal thei ang.

Deutsche Bank Park-ah Frankurt-in bul an ṭan ṭha a, Fares Chaibi-a'n crossbar a pet per a, hemi per changtu Omar Marmoush-a'n minute 12-naah a pet goal. Bayern striker Harry Kane-a'n hun ṭha a bawhpelh a, goal pawnah chiah a pet.

Minute 31-naah Eric Dina Ebimbe-a'n huai takin a la lut a, Alphonso Davies leh Dayot Upamecano ten an veng chungin Frankfurt goal hnihna a khung. Minute li hnuah Hugo Larsson-a'n Upamecano veng mah se chiang zetin a pet goal.

First half-ah Joshua Kimmich-a'n box pawn aṭangin a khung a, 3-1 ni hman mah se second half-ah mualneitu bawk an che ṭha. Minute 50-naah Eric Dina Ebimbe-a'n a pet goal leh a, Bayern tlarhnung an ṭhiat chiang. Minute 60-naah Ansgar Knauff-a'n Frankfurt tan a khung leh a, mualneitu an khel fuh hrim hrim.

Bayern an khel fuh lo a, nawr tum viau mah se goal chance insiam an harsat. Frankfurt-in an mualah Bayern 5-1 in an hneh a, an club history-a hun chhinchhiah tlak a ni. Chutihrualin kum 2019 khan Frankfurt-in an mualah tho hian Bayern 5-1 in an sawp tawh a, an manager Niko Kovac an ban nghal. Tun ṭum a mualphona avang hian Thomas Tuchel dinhmun a derthawng phah ang.