Aizawl FC-in Shillong an luhchhuah

I League-ah Shillong Lajong-in match hmasa pariatah hneh loh an tawng lo a, Aizawl FC an la hmachhawn loh vang a lo ni. Mizo club hian Polo Ground-ah Lajong an hmachhawn a, 3-0 in an luhchhuah. AFC tan hian Lalrinzuala, R. Ramdinthara leh Joe Zoherliana ten goal an khung.

Aizawl FC-in bul an ṭan ṭha a, minute lina lekah Lajong right back Kynsailang Khongsit tauh fuh tawk lo chu Serchhip tlangval Rinzuala'n ṭha zetin box pawn aṭangin a khung. Stadium khata inkhel entu an ngawi ṭhap.

Mualneitu Lajong hian inkhel an thunun a, ball pawh chang tam mah se Aizawl FC tlarhnung an ṭang khawng ve tlat. Minute 17-naah Sheikh Sahil ball pek luh ṭha chu R. Lalthanmawia'n um lutin a cross ball ṭha zet chu Tharpuia'n ṭha zetin a khung - first half-ah 2-0 a ni.

Minute 57-naah Zohera'n corner kick aṭangin a tauh lut a, Trau laka goal hnih khungtu Lengpui tlangval hian goal khung lawm dan a bei mawi leh pek hle. Mipui puihna nen Shillong Lajong-in na takin nawr mah se Aizawl FC an ṭang tluan a, 3-0 in an chak.

Mizo club hi Mizo coach B. Malsawmzuala'n a enkawl a, Sawmtea hnuaiah Aizawl FC result a ṭha. Sawmtea hoin Aizawl FC hi vawi nga an chak - Sreenidi Deccan, Neroca, Namdhari, Trau leh Ljong te an hneh. Mizo club hian Delhi FC chauh hneh loin Rajasthan FC leh Real Kashmir te nen an inhnehtawk.

Aizawl FC hian match kua an khelh aṭangin point 17 an hmu a, pahnihnaah an awm mek. Mizo club hian kuminah Gokulam Kerala leh Inter Kashi te an la mikhual dawn a, hnehna an chang ve ve a nih phei chuan pakhatnaah an awm thei hial ang. RG Stadium-a inkhel tur hi zan a ni dawn a, Mizo club-in Mizo mipui ṭawiawmna an mamawh dawn a ni.