Real chak nan Bellingham-a goal a tawk lo

Jude Bellingham-a'n goal a khung thu hi chanchinthar a ni tawh lo - Inrinni zan pawh khan goal a khung leh ta a, mahse, tun ṭum erawh Real Madrid an chak zo lo a, an mikhualna ramah Real Betis nen 1-1 in an inhnehtawk.

Bellingham hian minute 53-naah goal hmahruai a khung a, mahse, Betis tan Aitor Ruibal chuan mawi zetin si phurh sutna goal a khung - hun tawp thlengin goal dang a lut tawh lo a, 1-1 in an ṭin.

Real-in hnehna an chan zawh loh avangin an hmahruaina dinhmun a derthawng nghal a, nizan khan pahnihna Girona leh Barcelona inkhelin result kan hre hman lo - Girona hian hnehna an chan chuan table chung ber an luah nghal ang.

A tawk lo

Real-in goal khung turin second half an nghah thlen a ngai a, Bellingham chuan minute 53-naah goal hmahruai hi a khung - Brahim Diaz-a ball pek ṭha zet chu a awma la thlain, goal-ah a chantir a, Madrid khaw club-in 1-0 in hma an hruai.

Spanish club lian hlim chhung erawh rei lo tak a ni. Minute 66-naah Aitor Ruibal chuan si phurh a sut - goal mawi bik a ni a, si ban nghaktu Andriy Lunin tan pawh chu goal mawina pawmpui mai lo chu tih theih a awm lo.

Real-in 63% zet ball chang mah se a pawimawh ber goal an khung zui thei lo a, point khata lungawi an zir a ṭul - Real hian vawi 12 shot neiin, vawi hnih chiah target zawnah a kal a, Betis hian vawi 14 shot neiin, vawi ruk chu target-ah a kal thung.

A hming Jude

Real tan Bellingham-a'n goal a khung leh ta a, English midfielder chanchin hi kan duh emaw, duh lo emaw, a chet ṭhat reng avangin kan sawi tel zel a ngai rih - a hmuhnawm tlat!

Kum 20 mi midfielder hian tun season-ah Real tan inelna hrang hrangah match 18 khelin goal 16 a khung ta der a, La Liga bikah chuan match 14 khela goal 12 khungin, assist vawi hnih a nei bawk.

Borussia Dortmund midfielder hlui hi midfield-a a che vel a hmuhnawm reng a, football mawina phochhuaktu zingah a tel. A pawi ber erawh Real a chakpui zo lo a, player dangin goal khung an zir ve a ṭul niin a lang.

A ṭha e

Real boss Carlo Ancelotti chuan, "Game inhnehtawk tak a ni a, team pahnihin kan khel ṭha ve ve. Kan thuhnuaia game kan dah lai takin goal kan chhuah palh hlauh a, mahse, result fair tak erawh a ni tho e," a ti a, chhuanlam a zawng lo.

Italian coach chuan Betis fak zuiin, "Betis-in theihtawp an chhuah dan kha en ila, a tlawm lama an ṭang mai kha chu a fuh tawk lo a ni. He hmuna inkhelh hi a harsat ṭhin avangin result ṭhaah ka ngai a ni.

"Betis khan goal mawi zet an rawn khung a, match zawng zawngah chak theih a nih miau loh avangin, kan khelh danah ka lawm tawk e," a ti a, 1-1 chu result awm tak a nih thu a sawi.