Mumbai-in Bengaluru an sawp

Zirtawpni zan Indian Super League inkhelah Mumbai City chuan 4-0 in Bengaluru FC an sawp a, Bangalore club hian inkhelh zawh hnu lawkah an coach Simon Grayson leh assistant Neil McDonald an ban zui.

Sree Kanteerava Stadium-a inkhela goal khungtu zingah Lallianzuala Chhangte a tel a, AIFF player of the year ni lai hian minute 61-naah penalty aṭangin an goal lina chu a khung.

Mikhual team tan hian Abdenasser El Khayati chuan minute 11-na lekah goal hmahruai khungin, Akash Mishra leh Jorge Pereyra Diaz (penalty) ten goal khat ve ve an khung bawk a, 4-0 in an chak.

Mumbai tan Lalengmawia Ralte (Apuia) chuan inkhel bul ṭanin, bench aṭangin Lianzuala luhtir a ni a, Mizo forward hian khelmual a luh aṭanga minute hnih hnu lawkah penalty aṭangin a khung zui.

Inkhelh zawhah Bengaluru neitu Parth Jindal chuan, "Hei hi Bengaluru a ni lo - thil kan thlak danglam dawn. Kan awm ṭhinnaah kan awm leh a ngai a, a zahthlak takzet. Min hrethiam ula, hetianga khelh hi BFC nen a inrem lo," a ti a, a lungawi lo hle.

A hnu lawkah Bengaluru hian chanchinthar an nei zui a, coach Simon Grayson leh assistant Neil McDonald te nen inhriatthiam tawnnaa an inṭhen thu a ni.

Sunderland boss hlui Grayson hian season hmasa ṭan dawn khan Bengaluru hi enkawl ṭanin, Durand Cup-ah a champion pui nghal a, ISL leh Indian Super Cup-ah final hruai thleng ve vein, a tlawm zawkah an ṭang ve ve thung.

English coach an ban tak avangin Renedy Singh chuan Bengaluru hi a lo enkawl lailawk dawn a, engtikah nge Bangalore club hian coach nghet an neih ang, sawi lawk a la awm lo.

Hetihlai hian Inrinni zan khan ISL match khat awmin, East Bengal leh Punjab FC chu 0-0 in an inhnehtawk a, team pahnihin goal khung an harsat ve ve - East Bengal tan Lalchungnunga chuan inkhel bul ṭanin, Punjab tan Daniel Lalhlimpuia chu bench aṭangin a lut bawk.

Nizan ISL-ah NorthEast United leh Hyderabad inkhelin, result kan hre hman lo a, zaninah ISL match a awm lo ang.