Inter Milan leh Juventus an sang zel

Serie A champion tuma inum boruak a sang chho zel - Inrinni zan khan Inter Milan chuan an hmahruaina sawhnghet turin an mikhual Udinese chu 4-0 in an sawp a, inkhel dangah AC Milan erawh Atalanta mualah an chak lo.

Zirtawpni zan khan Juventus an inlan a, season hmasa point an paihsak avanga buai Old Lady chuan champion lai Napoli 1-0 in an hneh a, match 15 aṭanga point 36 hmuin an chunga awm Inter an phak lohna chu point hnih chauh a ni.

Allianz Stadium, Turin-a inkhelah Juventus tan Federico Gatti chuan minute 51-naah goal awmchhun a khung a, champion lai Napoli lamin ball chang tamin goal khung tumin vawi 13 ngawt pet mah se goal an khung thei lo.

Juve manager Massimilano Allegri chuan, "Hnehna kan chan hi a pawimawh, season ṭha tak kan hmang tih fiahtu chu tunah hian Napoli nen kan inkarah point 12 a awm, tuna kan kal anga kal chhunzawm theih ngei hi a ṭha ang.

"League a nih avangin a la rei dawn a, season dang liamta te kan thirkir chuan tlarhnung lam veng ṭha apiang hi an champion niin a hriat, chuvangin keini pawhin goal khung tlukin a venhim kan ngai pawimawh ang," a ti.

Juventus an chak tih hresa chungin Inrinni zanah Inter Milan an inlan a, an chesual lo. Simone Inzaghi enkawl team tan hian Hakan Calhanoglu, Federico Dimarco, Marcus Thuram leh Lautaro Martinez te chuan goal khat ṭheuh an khung.

Inter manager Inzaghi chuan, "Goal ṭha tak tak kan khung a, a tir aṭangin kan khel ṭha tluan. Udinese hi table mawng lama awm lai chu an nei ngei mai, mahse player ṭha tak tak an kawl aṭangin a tawp thleng khan kan fimkhur hle," a ti.

Inkhel dangah AC Milan tan Olivier Giroud leh Luka Jovic ten goal an khung a, mualneitu Atalanta lamin Ademola Lookman hmanga goal hnih an khung bakah, hun tawp dawnah Luis Muriel chuan 3-2 a an chakna goal a khung.