Nantes lakah PSG an vannei

Paris Saint Germain tan Ligue 1 champion nih hi tun hnaiah chuan thil awlsam tak a ni bik lo. Inrinni zana an mikhual Nantes chu hun tawp dawna substitute Randal Kolo Muani goal khung hmangin 2-1 in an hneh hram.

Paris khawpuia inkhelah PSG tan Bradley Barcola chuan chawlhlawk hma deuhin a khung a, second half-ah mikhual team tan Mostafa Mohamed-a'n tauh lutin a sut, hun tawp dawnah France international Muani a inlar leh a ni.

PSG coach Luis Enrique chuan, "Theih ni se la chuan first half-ah khan goal khat aia tam khungin inkhel kha kan thunun thei tur a ni a, mahse kan hun ṭha kan bawhpelh leh tlat ṭhin. Nantes khan tharum an ngahin an che rang hle a, an lak aṭanga point thum hmuh theih hi a ṭha," a ti.

Inkhel dangah AS Monaco chuan Rennes 2-1 in an hneh ve bawk a, league match 15 aṭanga point 30 hmuin pahnihna dinhmun an luah - hmahruaitu PSG an phak lohna hi point ruk a ni mek.