Mumbai coach thar Kratky

ISL club Mumbai City chuan an coach Des Buckingham an chân hnuah a hmun ruak luah tur an nei ta a, A League club Melbourne City assistant coach Petr Kratky chuan Indian club hi a enkawl ang.

Kum 42 mi coach hian coaching a luhchilh hnuah Melbourne City aṭanga a career ṭanin, Academy coach angin a zawm phawt a, a hnuah Assistant Coach-ah kaisantir niin, Patrick Kisnorbo, Rado Vidosic leh Aurelio Vidmar-te hnuaiah a thawk.

Czech coach Kratky hian kum 15 chhung professional football-ah player a nihna angin hun a lo hmang tawh a, an ram club ṭha Mlada Boleslav leh Slovan Liberec-ah te pawh lo khel tawhin, Australian club Heidelberg United-ah a career kharin, coaching lam a luhchilh zui a ni.

Mumbai hian ISL-a hlawhtling taka lo hruai tawhtu Des Buckingham chu League One club Oxford United-ah an chhuahtir a, a aiah City Football Group thoa thawk lai Kratky an la lut ta a ni.