Manchester United leh Ten Hag-a hmalam hun a hriat dawn

Zanin dar 1:30 hian Old Trafford-ah Manchester United-in Bayern Munich an mikhual dawn a, Erik Ten Hag-a hote hi an chak a nih pawhin inkhel danga FC Copenhagen leh Galatasaray te an inhnehtawk a nih ngawt loh chuan UEFA Champions League last 16 an lut thei lo. Chutihrualin Man United hian hnehna an chan hrim hrim chuan Europa League playoff round-ah an khel thei ang.

Man United hi tun hnaiah an mualpho zeuh zeuh avangin manager Erik Ten Hag-a hma lam hun pawh hi a chiang lo. Bayern Munich an mikhual zawhah Man United hian an hmelma leh Premier League hmahruaitu Liverpool chu Anfield-ah an tlawh dawn. Ten Hag hi chelh duhtu an la awm rualin ban duhtu pawh an inlar leh ṭan ta.

Ṭahna ruam chu

Tun season-ah Manchester United ṭantuten hlim lai an nei meuh lo a, ni chhuak han hmuh zawk chang te nei bawk mah se chhum thim chhah takin a hliah leh thuai ṭhin. Premier League-ah Man United hian draw an la nei miah lo a, an chak a nih loh chuan an chak lo zel.

Ten Hag-a hoten vawi thum chak zawn an nei ve zeuh tawh a, chutiang bawkin vawi hnih chak zawn ṭum khat an nei tawh. A bak zawngah chuan an chak zawhah an chak lo zel a, Arsenal leh Brighton & Hove Albion 3-1 ve vein season tir lamah an hneh lo zawn tawh bawk.

Tun hnai bikah vawi thum an chak loh zawn zawhah Newcastle United 1-0 in an hneh lo a, goal tam zawk chhuah thei an nih avangin Magpies laka an chak lohna hi mualphona a tling. Mahse, Chelsea lakah champion team khelh dana mawiin an rawn khel chhuak leh a, Man United hian inkhel thunun chungin London club hi 2-1 in an hneh.

December thlatira Ten Hag-a hote harhtharna chan hian Krismas boruak em pawh a thleng zo lo a, Bournemouth lakah 3-0 zetin an tlawm. Table hnuai lama awm Cherries laka goal thum chhuah hi United tan a zahthlak a, inkhelhna hmun hi Old Trafford a nih lehzel avangin mualphona hi belhchhahin a awm.

Champions League-ah Man United hlim chhung a tawi lehzual a, vawi nga khelhah vawi thum chak loin an muala Copenhagen an hneh tih loh chu chak hmel an hmu lo. Match hnuhnung berah Galatasaray lakah bul ṭan ṭha mah se a tawpah 3-3 a ni a, an chak zawh loh avangin tla thei dinhmunah an din phah.

Beiseina chu

Manchester United khingpui tur Bayern Munich hi an tling tawh a, an la chak vek avangin group A-ah pakhatna an ni chiang tawh bawk. Thomas Tuchel-a hote hi match ngaah point 15 hmu mah se awlsam taka chak an nei bik lo a, point-a an sang fal vang hian an ṭha fal tihna a ni lo.

Bayern leh Man United a nih tawh chuan 1999 UCL final hriat chhuah a awl a, Ten Hag-a hote tan knockout stage lut turin Nou Camp-a Sir Alex Ferguson-a hote chunga thilmak thleng ang kha an mamawh. Man United tan Old Trafford-a Bayern hneh hrim hrim hi thilmak a ni hran lo a, an chak baka Copenhagen leh Galatasaray te an inhnehtawk a nih chuan thilmak a ni ta ve ang.

Chutihrualin Copenhagen leh Galatasaray te hi Istanbul-a an inkhelh hmasak ṭum khan an inhnehtawk. Copenhagen-ah pawh result ngai hi thleng nawn thei a ni a, Man United tan beiseina tlem chu a awm.

Tuchel a him bik lo

Ten Hag chauh hi hma lam hun chiang lo a ni lo a, Bayern enkawltu Thomas Tuchel pawh hi duh lotu an ṭhahnem tawh hle. Season liam taa Tuchel-a'n Bavarians a zawm khan treble champion thei an la ni a, hun rei lote chhungin UCL leh German Cup aṭangin a tlakpui a, Bundesliga-ah pawh Borussia Dortmund chetsual vangin an champion hram.

Tun season-ah Xabi Alonso kaihhruai Bayer Leverkusen an che ṭha a, Bayern hi pahnihnaah an awm mek. Kartawp khan Bayern hian Eintracht Frankfurt chu 5-1 ngawtin an hneh lo a, Tuchel-a'n knockout stage lut turin point mamawh tawh lo mah se a hna chelh chhunzawm turin chak a pawimawh dawn.

Bayern-in Allianz Arena-ah Man United hi 4-3 in an hneh a, goal khungtute hi player thar Harry Kane bakah Leroy Sane, Serge Gnabry leh Mathys Tel te an ni. Old Trafford-ah Tuchel-a'n player a siksawi hret dawn nge sa huai a ser dawn tih a hriat lo a, chutihrualin chak loh pawi ti loa player rem aiin chak theihna tur tawkin player a rem dawn.

Engtin zel?

Man United tana chanchin lawmawm chu Casemiro-a'n training a zawm tawh a, Brazilian midfielder hi October thlaa inhliam kha niin Bayern Munich laka inlan thei dinhmunah a ding.

Ten Hag-a'n Bayern lakah tlarhnung a rem phui a ṭul dawn a, chutihrualin hnehna chang tur chuan goal khung a ngai. Rasmus Hojlund-a'n Premier League-ah goal la khung lo mah se UCL-ah goal nga a khung tawh a, Danish striker tan tun hun hi Old Trafford-a hming chher theihna remchang a ni.

Chutihrualin Bundesliga-a goal 18 khung tawh Harry Kane tan UCL-a goal khung tam ber ni turin Old Trafford-ah a khung a ngai a, Hojlund aiin goal khatin a khung tlem zawk. Nomawi chawi duha Bayern pantu Kane hi Man United tlarhnung tan ven uluk a ṭul ang.