Ka player-te hi ka chhuang - Sawmtea

Aizawl FC-in Pathianni khan tun season I League-a hneh loh la tawng lo Shillong Lajong chu an mual Polo Ground ngeiah an luhchhuah a, 3-0 ngawtin an sawp. Mizo club coach B. Malsawmzuala chuan, "Away match khel tura kan zinchhuah aṭang khan Shillong Lajong hmachhawn hun hi ka nghakhlel a, hneh hmasa bertu nih ka châk," tiin a sawi a, Mizo coach hian a thil châk hi a tihlawhtling.

Nimin khan Aizawl FC hian Aizawl an rawn pan lehnghal a, Sawmtea chuan, "Theihtawp chhuaha khelmuala beitu ka player-te hi ka chhuang. Anmahni vanga tun dinhmun hi thleng thei kan ni," tiin Vanglaini a hrilh. Season ṭantirhah Aizawl FC hi Dutch coach Erol Akbay-a'n a enkawl a, Mohammedan laka an tlawm hnuin a bang.

Luangmual pa Sawmtea hian a hun ṭha hi a hmang ṭangkai a, I League-ah hming a chher hle. Sawmtea hnuaiah Aizawl FC result a ṭha a, vawi nga an chak - Sreenidi Deccan, Neroca, Namdhari, Trau leh Lajong te an hneh. Mizo club hian Sawmtea hnuaiah Delhi FC chauh hneh loin Rajasthan FC leh Real Kashmir te nen an inhnehtawk.

Aizawl FC hian December 13, Nilaini tlai dar 3:00-ah MPL league match hnuhnung berah FC Venghnuai an hmachhawn ang a, I League-ah Goklukam Kerala (December 16) leh Inter Kashi (December 21) te an mikhual dawn. I League inkhel hi zan dar 7:00 ve ve a nih avangin entu pawh an ṭhahnem viau tura ngaih a ni.