Project Veng titla theitu Police

Zote Toyota MPL10-ah vawiin tlai dar 4:00 hian RG Stadium-ah Mizoram Police FC leh Project Veng FC te an inkhel dawn. Lalbiaksanga Colney enkawl Police hi semifinal lut tawh an ni a, R. Lalrammawia kaihhruai Project Veng hi relegate thei an ni thung.

A pawimawh em?

Police hi table-ah pahnihna a ni mek a, vawiina an result hian semifinal-a an khingpui turah awmzia a nei dawn. Project Veng hi Police-in an hneh chuan hmahruaitu an ni dawn a, pakhatna ni chunga league round an khar chuan Chhinga Veng emaw Aizawl FC emaw chu an khingpui tur a ni.

BS-a Colney hian duh thlang dawn ta se Lalsangzuala Hmar enkawl Chhingcows emaw I League club emaw hmachhawn hi a châkawm lo ang. Aizawl FC hi round 14 aṭang chuan an kim tawh dawn a, semifinal an lut thei a nih chuan champion rinkai an ni hial dawn.

I League club hian khualmualah Trau FC leh Shillong Lajong an sawp thei a, inrintawkna nasa tak an nei mek. Chutihrualin Police hian Aizawl FC an hlauh vang ni loin semifinal dinhmun thlir vangin player a hahdamtir a rinawm. Semifinal-ah chuan player tawnhriat nei ṭha an kawl hnem a, eng team pawh hmachhawn se an hlau lo ang.

Project Veng beiseina

MPL-ah hian table mawngphaha awm an relegate nghal a, pasarihnaa awmin relegation playoff an khel dawn. Point inang an awm a nih chuan head to head en hmasak tur a ni a, chumi zawhah chuan goal difference en tur a ni.

Project Veng hian an muala MPL khelh a nih ṭumin Venghnuai hi 2-1 in an hneh a, round 10-ah Venghnuai hian 1-0 in an hneh let. Head to head-ah an intluk tawk chiah a, away goal rule a awm tawh loh bawk avangin inelna pumpuia goal difference en a ni dawn.

Kolasib club hi an chak lo a nih pawhin an chak lohna ang zat thoa FC Venghnuaiin Aizawl FC an hneh loh chuan pasarihna an awm chhunzawm ang a, relegation playoff hmang ṭangkaiin MPL an khel chhunzawm thei ang.

Mahse, Project Veng duh ber tur chu parukna nih phak a, a him china awm a ni. Chumi tur chuan Kolasib club tan chak a ngai dawn. R. Lalrammawia hote hian hnehna an chan a, Electric Vengin Chawnpui laka point an hloh chuan a him chinah an awm dawn.

Head to head-ah Project Veng hi Electric Veng aiin an ṭha zawk. An intawn hmasak ṭumah 2-1 in hneh lo mah se an intawn hnuhnun ṭumah 4-2 in an hneh a, hei vang hian Project Vengin Police an hneh chuan him turin beiseina sang tak an nei ang.