Chelsea hnehtu Everton

Everton chuan Premier League match an khelh hnuhnung pathumah hnehna an chang vek, kum 2021 hnua hetianga an kaltluan leh theih vawi khatna niin, a tuartu chu an mikhual Chelsea an ni thung.

Pathianni zan Goodison Park-a inkhelah Everton hian Abdoulaye Doucoure leh substitute Lewis Dobbin te goal hmangin Chelsea 2-0 in an hneh a, point 10 ngawt an paihsak avanga talbuai Sean Dyche leh a naute tan chanchin lawmawm bik a ni.

Goal hnih a lut

Chelsea forward Cole Palmer a hlauhawm hmasa, box pawn aṭanga a shot ṭha zet mai chu Jordan Pickford-a'n a lo dang hram. England international goalkeeper hian a hnua Enzo Fernandez khung tur pawh a dansak leh bawk.

Blues lamin mangnghilh an nei a, goal khung tuma an nawr luatah an hnung lam a phui lo. Jack Harrison leh Dwight McNeil ten goalkeeper Robert Sanchez tana hna hautak an siamsak hnuah Doucoure a rawn inlar.

Counter attack hmangin Everton an hlauhawm a, defender pahnih inkara ball dawngtu Dominic Calvert-Lewin khung tur chu lo dansak hman mah se, ball per hi Doucoure-a'n chiang zetin a lo hlap lut pawp a ni.

Hun tawp dawnah Toffees bawk an che fuh, corner aṭanga ball kal an tauh chhuah ṭhat tawk loh dawngtu Dobbin chuan an chak nemnghehna a khung a, goal dang lut zui tawh loin Dyche-a nauten point thum hlu tak an hlawh chhuak.

Match thum chak

Premier League sum leh pai inkaihhruaina dan an bawhchhiat avangin Everton hi an neih sa point 10 ngawt mai paihsak an ni a, tlak hlauhthawnawmah an ding. Mahse, tun hnaiah nasa taka bei letin team hmuhnawm an indin mek.

Hripui len lai khan Carlo Ancelotti hoin EPL-ah a zawnin vawi thum an chak a, hemi ṭum hi 2020-21 season kha a ni. Tunah chuan Italian manager ropui hoa an sulhnu ang kha an tawng thei leh ta a, an tan chanchin lawmawm a ni ang.

Toffees manager Dyche chuan, "Chawlhkar khat chhungin match vawi thum kan khel a ni ber a, chutiang chunga Chelsea kan hneh thei hi thil lawmawm tak a ni. A bik takin Doucoure khan fak a phu, khelmual chhungah khan a hah tih a lang lo," a ti.

Poch leh Blues

Mauricio Pochettino enkawl Chelsea hi tun season Premier League-ah vawi sarih ngawt an tlawm ta. Everton kha point paihsak lo se la chuan Blues aiin point li ngawtin an sang zawk dawn tihna a ni - London club an harh a ngai hle.

Blues hian goal khung theihna remchang chu an insiam leh nual, mahse ni dang ang bawkin a hmawr an bawk hleithei tlat lo. Goal khung an harsat chu thu hran ni se, match 16 aṭanga goal 26 ngawt an chhuah avangin a hnung lam pawh a phui chuang lo.

Chelsea manager Pochettino chuan, "Team ṭha zawk kan ni a, inkhel kan thunun bawk - mahse a pawimawh ber goal kan khung tlat lo. Chak kan duh a nih chuan goal kan khung a ngai," a ti. Christopher Nkunku chhawr theih thuai a châk khawp ang.