Man City chak ve ta!

Premier League champion lai Manchester City an che fuh lo rei a, an league match hnuhnung paliah chak ni hmel an hmuh loh avangin an hun a liam dawn nia sawi pawh an awm hman, tunah erawh an chak leh ta.

Pep Guardiola naute hian Pathianni zan khan Luton Town lakah goal an phur hmasa zet a, mahse second half-ah Bernardo Silva leh Jack Grealish te hmanga chhang letin, 2-1 in hnehna an chang a ni.

Phil Foden leh Rodri ten hlauhawm takin pet hmasa mah se Luton goalkeeper Thomas Kaminski-a'n a lo dansak phawt. Chawlhlawk hma chiahin box chhunga ball inchuh zinga zuang sang ber Elijah Adebayo chuan Andros Townsend-a cross a tauh lut.

Hliam vangin Erling Haaland a tel thei si lo, an match hmasa lam angin Man City hi an buai leh mai rinna pawh a lian hman. Mahse, Rodri-a ball hloh chu laklawh nei miah loin Silva-a'n a khung a, mualneitu lam insiamrem hmain Julian Alvarez chuan Grealish tan a siamsak bawk.

Man City manager Guardiola chuan, "Match li chhung chak ni hmel kan hmu lo a, hetiang hi chu kan zia a ni lo. Mi ṭhenkhat chuan kan hun a liam ta nia lo sawi pawh an awm hman, kan tan erawh hei hi chona a ni thung.

"Ka naute pawh kan hmaa chona awm hmachhawn ngam tur leh, miten min sawi dan hi a dik lo a ni tih fiah turin ka ti. Inkhelh hma khan hmahruaitu kan phak lohna chu point sarih a ni hman, tunah chuan point li a ni leh ta hi a lawmawm," a ti.

Luton manager Rob Edwards chuan, "Chak lo mah ila inrintawkna tam tak kan neih belh phah ngei ang, a chhan chu ṭha takin Man City lakah kan khel thei kha a ni, kan hmahruaina kan hum thei lo erawh a pawi," a ti. Hun tawp dawna Ross Barkley khung loh kha an ui khawp ang.