Spurs lakah Magpies an zawr

Tottenham Hotspur chuan an elpui Newcastle United 4-1 in an sawp. Ange Postecoglou enkawl Spurs hi an match hnuhnung panga zinga paliah an tlawm a, tunah erawh an tan kawl a eng ve leh dawn ta niin a lang.

North London club tan captain Son Heung-min a thawhhlawk hle, an goal hmasa pahnih chu Destiny Udogie leh Richarlison te khung ni mah se a bul tumtu chu Son a ni - South Korea international hian goal luh hmain hna harsa leh hautak a thawk zo vek.

Brazil international Richarlison-a'n an goal thumna leh ama goal hnihna ni turin, mawi taka ball kang a lak thlak hnuah a khung. Son-a'n ama penalty hlawhchhuah hmangin chak a nemnghet a, hun tawp dawna Joelinton-a goal chu Magpies mualpho hliah nan a tawk zo lo.

Spurs manager Postecoglou chuan, "Kan khel ṭha vek, a bik takin tlarhma lam khan an hna an tlin hle. Sonny khan kan tawn kawng a sial a, ball a chan apiang mai khan a hmuhnawmin a hlauhawm zel, kan phu ang takin kan chak niah ka ngai," a ti.

Tun hnaiah Newcastle United an khel ṭha tawk lo a, player pawimawh ṭhenkhat an hliam bawk avangin hun harsa an hmang. Spurs lakah chak lo mah se Callum Wilson leh Sean Longstaff te an inkhel thei ve leh ta erawh lawmna tur a ni ang.

Kum 46 mi Eddie Howe naute hian Nilaini zanah Champions League khel turin AC Milan an mikhual zui dawn. Magpies hian last 16 lut turin beiseina an la nei a, chutihrualin an chak ngei ngei a ngaih bakah Borussia Dortmund leh Paris Saint Germain inkhel result an ngaihchan tel a ngai.