NBA Cup champion Lakers

A vawi khat nana buatsaih NBA Cup an khel zo a, player ṭha danglam bik LeBron James leh Anthony Davis te awmna Los Angeles Lakers chuan Indiana Pacers lakah 123-109 a hnehna changin an champion.

Lakers tan Anthony Davis chuan point 41 a neih bakah rebound vawi 20 lain a thawh hlawk hle a, player ropui James pawhin point 24 a neih bakah rebound ṭum 11 a la bawk - an champion theih nan Davis leh James an thawh hlawk takzet.

Most Valuable Player (MVP) atana thlan James chuan, "Sulhnu ropui leh ṭhate chu khum theih a ni a, a hmasa ber nihna erawh tumah a inchhuhsak theih loh. In-season tournament champion kan nihna hi tumahin min laksak tawh lo ang," tiin a sawi.

Las Vegas khawpuia inelna neih hi Pacers tan a uiawm thung - hun tawp dawn minute ruk chauh awm tawhah pawh point thumin hma an hruai, mah se a tawpah erawh Lakers an chungnung.

NBA In-Season Tournament hi NBA Cup tia sawi a ni a, kumin hi an buatsaih vawi khatna a ni. NBA conference pahniha team-te chu group parukah ṭhen hran an ni a, group khatah panga awmin vawi khat ṭheuh an inkhel chhuak.

Group tin aṭangin a sang ber ṭheuh quarterfinal khel turin an tling a, Western Conference leh Eastern Conference-a tiṭha pakhat ve ve an tling bawk. Group stage aṭanga semifinal thlenga an result hi regular season pangngai ang vek a ni.

Quarterfinal hi knockout hmanga khelh a ni a, LA Lakers-in champion turin Sacramento Kings, New Orleans Pelicans leh Indiana Pacers te an hneh.