Barca an tlawm - hmahruaitu chu Girona!

Pathianni zan La Liga inkhelah Girona chuan 4-2 in khualmualah Barcelona an hneh a, Spanish top flight league hmahruaitu an ni - i chhiar dik e, Real Madrid, Atletico Madrid leh Barcelona awmna league-a hmahruaitu chu i hriat ngai loh Girona an ni.

Barca khelmuala inkhelah Girona tan Artem Dovbyk, Miguel Gutierrez, Valery Fernandez leh Cristhian Stuani te chuan goal khat ṭheuh an khung a, Catalan club tana Robert Lewandowski leh Ilkay Gundogan goal khungin awmzia a nei phak lo.

Girona-in hnehna an chan avangin league match 16 an khelah point 41 hmuin hma an hruai a, an hnuai chiaha awm Real aia an sanna chu point hnih a ni - pathumnaah Atletico an awm a, Barca nen point 34 ve ve an nei.

Atletico hian Pathianni zan inkhel dangah Almeria chu 2-1 in an hneh a, Álvaro Morata leh Ángel Correa ten goal an khung a, Almeria tan Léo Baptistão chuan goal khat a khung. Atletico hi Barca nen an point hmuh zat inang mah se match khatin an khel tlem zawk tih hriat a ṭha.

A mawi a mawi

Nou Camp thuam ṭhat mek a nih avangin Barca-in Lluís Companys Olympic Stadium chu an khelmualah an hmang rih a, an khelmual hmingthang Nou Camp zunzam tel loin an mualah Girona hian an zuam sawt em ni chu aw, tih mai turin goal an khung hma.

Ukraine forward Dovbyk chuan minute 12-naah Girona tan goal hmahruai a khung a, goal mawi bik a ni - right back Yan Couto chuan ṭha zetin ball a pe lut a, Viktor Tsyhankov chuan Barca offside trap buma lo dawngin, ram tana a khelhpui Dovbyk tan a siamsak.

Kum 26 mi Dovbyk hian harsatna nei loin goal-ah a chantir a, Barca fan-te thawm a reh. Mahse, Catalan club hian ngawih rei erawh an tum lo - minute kua hnu lawkah Raphinha corner aṭanga ball kal chu Lewandowski chuan a tauh lut.

Barca fans thawm a ṭha a, an hmaa lo thleng tur an hriat lawk bik miau loh avangin dem theih an ni lo - minute 40-naah ngawihtir an ni leh a, Gutierrez chuan ṭha zeta ball a tlan luhpui hnuin, mikhual team hma a hruai nawnpui.

A har a ni

Barca fan-ten second half-ah an insiamṭha dawn emaw an ti a, mahse, an ring sual. Spanish champion hian minute 80-naah an goal thumna an chhuah a, Fernandez chuan Stuani ball tauh a lak thlak hnuah Barca defender Jules Kounde a bum a, goal kilah tak a dah.

Fernandez goal khung hi minute 80-na a nih tawh avangin chak tur a chiangah a ngaih theih a, mahse, Barca an beidawng duh bik lo - hun pek belh minute hnihnaah Gundogan chuan si phurh a sut ṭhen ve leh a, beiseina tlem a siamsak.

Mahse, Barca vanneih zan a ni lo - minute thum hnu lawkah Stuani a inlar ve leh a, hnai set sawt aṭangin an goal lina a khung. Barca tan beisei neih zuina chi a ni tawh lo a, Girona an chak zui.

Girona hian La Liga hi season li an khelh vena chauh a ni a, 10-na aia sangah season an khar ngai lo. Tunah erawh thawnthu ngaihnawm an ziak mek a, a tawp thlenga a changtupa nih theih an beisei ang.