Hmun ruak pakhat - a beiseitu pathum!

Champions League group stage intum tur pawh a nih khan group F-in ngaihven a hlawh nghal a, Borussia Dortmund, Paris Saint-Germanin, Newcastle United leh AC Milan te an awm khawm vang a ni.

German club Dortmund-in last 16 an lut fel tawh a, hmun ruak pakhat a la awm - PSG, Magpies leh Milan ten an beisei vek.

PSG hian zanin dar 1:30-ah tling chiang tawh Dortmund an lenchilh dawn a, French club tan inkhel lehlam result ngaihchan tel ngai lo tur chuan chak a ngai a, an chak phawt chuan last 16 an lut ang.

Zanin dar 1:30-ah vek Magpies chuan Milan an mikhual dawn a, team pahnih tan last 16 lut tur chuan chak ngei ngei a ṭul phawt a, PSG-in Dortmund an hneh loh a ṭul tel bawk.

PSG beiseina

Beisei anga season bul an ṭan loh hnuin, tun season-ah PSG an insiamṭha a, an league match hnuhnung pariatah an chak vek - Luis Enrique-a'n Dortmund lakah chak ngei a duh dawn a, group stage-a an tawp a nih ngat chuan Spanish coach hi ban a ni lo ang tih sawi theih a ni lo.

PSG hian hrem vangin Ousmane Dembele chhawr thei dawn lo mah se, Kylian Mbappe leh Randal Kolo Muani an la neih cheu avangin lungphanna tur a awm loin a lang a, Dortmund hian an ṭhat dan berin an khel kher lo thei bawk.

Bundesliga lamah Dortmund hi an dinhmun a ṭha lo hle. An league match hnuhnung berah RB Leipzig chu 3-2 in an ngam lo a, table-ah pangana an ni pha ṭawk a, champion tum team leh an awmna a inhmeh lo.

Dortmund hian last 16 an lut tawh tho a, Inrinni zanah league match an neih zui bawk avangin an ṭhat dan bera an inlan lo a nih pawhin dem theih an ni lo.

Magpies vs Milan

Newcastle-in Champions League-a an match hnihnaa 4-1 ngawta PSG an sawp kha chuan beiseina a sang hman hle. Mahse, mumang ram aṭanga kaih harhin an awm zui a, tunah chuan thih leh dam karah an awm leh ta.

Magpies tan Milan inhnehtawkpui ringawt hi last 16 luh nan a tawk thei. Chumi tur erawh chuan Dortmund laka PSG an tlawm emaw, an draw emaw a ngai thung. PSG-te hi inhnehtawk ta se, Magpies chak ta se, French club leh English club point hmuh zat a inang ang.

Mahse, Champions League-ah head-to-head en a ni a, Magpies tan an result hmasa hi vanneihna a ni thei dawn. PSG nen vawi hnih an intawn aṭangin point li an hlawh chhuak a, an point hmuh zat a inan chuan Eddie Howe-a naute an tlang dawn tihna a ni.

Hetihrual hian Newcastle hian tun hnaiah beisei an phak lo hle. An league match hnuhnung pahnihah a zawnin an tlawm a, an tlawm a ni satliah lo. Goal sarih an chhuah a, goal khat chiah an khung!

Mahse...

Magpies tan tun hnai result avanga hnual lutuk erawh a rem lo - mahni muala inkhel tur zawk an ni a, mipui puihna nen Italian club an lo mikhual dawn.

Milan hian an league match hnuhnung berah Atalanta chu 3-2 in an ngam lo a, table-ah pathumna ni mah se hmahruaitu Inter Milan an phak lohna chu point kua ngawt a ni tawh.

Serie A lama an result ṭha lo hi Champions League tala an thawi dam a ṭul a, chumi tur chuan tlarhmaah Olivier Giroud chet ṭhat a ṭul a, Rafael Leão a awm bawk.

Chutihrual chuan tun season-a an club top scorer ni mek Giroud hian goal kua khung tawh mah se, Christian Pulisic (5 goals) tih loh goal nga khung tling dang an awm lo hian ngaihtuah a ti thui a, hliamin a tihbuai Newcastle laka chak turin an ṭha tawk em, tih chu zaninah kan hre dawn.