Ronaldo tan goal 50

Cristiano Ronaldo leh goal sawi kan bang thei lo, kan la sawi chhunzawm zel dawn ni pawhin a lang - Al Nassr forward hian Saudi King Cup-a Al-Shabab 5-2 a an hneh ṭumin goal a khung leh a, kuminah goal 50 a khung tling ta.

Manchester United leh Real Madrid star hlui hian second half-ah goal a khung a, kumin ni loin season kal lai bikah pawh goal 26 a khung tawh a, a goal khung zinga 16 chu Saudi Pro League match 15 a khelh aṭanga a khung an ni.

Kum 38 mi Ronaldo chuan, "Hnehna ropui tak a nih bakah kum 2023 chhunga goal 50 ka khung tling ve leh ta hi ka lawm, ka ṭhiante leh fans bakah chhungkua aṭangin thlawpna ka dawng ṭha hle, chutihrualin hmasawnna tur pawh ka la nei," tiin hmasawn zel a la tum.

Al Nassr hian King Cup-ah semifinal an inhlangkai a, season hmasa pawh khan semifinal thlengin Al Wehda lakah an zinkawng a tawp, kuminah chuan hmasawn hret chunga final thleng ngei an tum ang.

Ronaldo-a'n a vanglai a hmang pel chho mek a, player ropui dang Lionel Messi pawhin hahdam takin football a khel tawh. Khawvelin anni pahnih inkhel lai aia en châk leh hmuh duh an la nei tam chuang lo, an intawn leh theih dan kawng a awm dawn.

Messi khelhna Inter Miami chuan season thar an inbuatsaihna tur an tichiang a, an hmachhawn tur zingah Ronaldo awmna Al Nassr an tel. Thil a danglam thut a nih lem loh chuan nakkum February thla hian Saudi Arabia-ah an intawng ang.